MGA pangulo sa nagkadaiyang barangay nga sakop sa Federation for the Welfare of Persons with Disability of Mandaue City, pinanguluhan sa ilang president nga si Joseph Jomantoc, ang nipagawas og manifesto, nihimo'g pagpirma ug pagdagkot og kandila pag-simbolo nga malamdagan ang panghuna-huna sa publiko nga hunongon na ang cyber-bullying sa mga PWDs.
Gihimo kini Martes sa buntag, Pebrero 19.
Kini human nga nakadawat sila og sulat pagpadayag og kasagmuyo gikan sa ilang sakop nga si Michael Pielago, nga nakadawat og nagkadaiyang pam-bully diha sa social media, human sa iyang pagpasaka og kaso sa buhatan sa Ombudsman batok kang Mandaue City Mayor Luigi Quisumbing, tunhod sa giingon nga diskriminasyon.
Apan giklaro sa grupo ni Jomontoc nga way bulok pamolitika ang ilang pagpagawas og manifesto ug nga ang ilang pagsuporta kang Pielago mao ang pagbatok lang sa mga gihimo nga pag-bully ngadto sa ilang kaubanan ug wala silay labot sa kaso nga gisang-at niini.