3 ka nurse gisilutan

Tuburan District Hospital (SunStar File)
Tuburan District Hospital (SunStar File)

GITAKTAK na sa katungdanan ang tulo ka mga nurse sa Tuburan District Hospital nga nikuha og video ug hulagway ingon man ni-upload niini sa social media sa napusilan nga gidudahang drug personality.

Samtang dunay laing regular nga kawani ang imbestigahon human nga nagpapasa kini og kopya sa video.

Sugod Martes, Pebrero 19, 2019, dili na makatrabaho ang tulo ka nurses sa Tuburan District Hospital.

Sila natumbok nga nikuha og video ingon man hulagway sa naglimbag-limbag nga pasyente nga si Gembe Casas, kinsa napusilan sa usa ka anti-drug operation sa kapulisan sa lungsod.

Matod ni Provincial Health Officer Rene Catan, mao kini ang rekomendasyon sa PHO grievance committee nga iimbestigar sa insidente.

Giuyonan usab kini ni Cebu Gobernador Hilario Davide III, kinsa wa makauyon sa gibuhat sa tulo.

Nasuta sa komitiba nga dunay “direct responsibility and liability” ang duha ka mga nurse nga maoy aktwal nga nikuha og video ug maoy ni-upload niini sa social media.

Ang laing usa ka nurse nasuta sa imbestigasyon nga nikuha og hulagway sa nagkadugo nga pasyente gamit ang iyang cellular phone, apan wa gi-upload.

Sigun ni Catan, dunay office memorandum gikan sa PHO batok sa maong mga buhat.

Nalapas sab nila ang balaod sa Data Privacy Act.

“Tungod sa ilang status ug direct violation sa atong memos, even sa HR memos, nga constantly reminding about this, so terminate nalang ilang contracts,” matod ni Catan.

Gawas sa tulo, dunay permanent employee nga midwife nga nakaserbisyo na og taas-taas nga panahon sa Kapitolyo, ang gitugyan ni Catan sa Human Resource Office aron pagsuta sa angayang silot alang kaniya.

Ang maong kawani nagpapasa og kopya sa video sa iyang cellphone.

“Usa ang ni-video ug ni-share sa usa ka nurse and ang midwife. Ang share sa katong usa, shared it to his cousin nga ni-share sa gawas, then ni viral,” sigon ni Catan.

Gitataw ni Catan ang ang tulo ka mga nurse di tangtangan sa lisensya.

Nakig-estorya ang tulo sa mga imbestigator ug nasuta nga nikuha sila og video aron anaa silay rekord sa pasyenteng lalake para mailhan.

“Ang ila rang ganahan ra gyud is to determine who is he. Because it was brought by the police unya wa man sila kaila so gi-record kuno. Di nana nila responsibility kon kinsa nang tawhana. Sa pulis na nga work. Ang ilaha is the responsibility, was to focus on what you need to do,” sigon ni Catan.

Matod niya, di magduha-duha ang Kapitolyo pagtaktak sa mga kawani nga makahimo sa samang kalapasan, lakip na ang pag-post ug pag-comment sa social media labot sa confidential unta nga hisgutanan sa ospital.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph