KAPULISAN sa Syudad sa Sugbo nga nag imbestigar sa kamatayon ni Ashley Abad nga namatay tungod sa pagka overdose sa giinom niining Ecstasy aduna nay gitumbok kinsa ang nag hatag sa illegal nga drugas sa dalaga.

Andam na ang kasong homicide nga ipasaka sa kapulisan nga mihimo sa imbestigasyon sa kamatayon ni abad, 19 anyos, human ma overdose niadtong Enero 20 sa gabii Matod ni Police Regional Office 7 Director Chief Superintendent Debold Sinas nga ang gihimo nalang karon sa Cebu City Police Pffice mao ang pag kompleto sa mga dokumento sa kaso.

Gihulagway sa heneral nga lig-on ang mga ebedensya nga ilang gihuptan sa pagkakaron ug gipaabot nalang ang pormal nga pagpasaka niining kaso ngadto sa piskalya.

Nailhan na usab sa kapulisan kung kinsa ang nag hatag sa tablitas nga Ecstasy ngadto sa dalaga apan nag dumili una sa pagtug-an si General Sinas kung kinsa sa pito ka mga tawo nga una nang gipatawag ang pasakahan og kaso.

Unom ka mga higala ni ashley nga kauban niini nga mitambong sa concert party ang napatawag na ug miluwat nag pamahayag ug ang ika pito mao ang hinigugma niini nga si Nel Spencer Tiu nga mihimakak nga aduna siyay kalibutan sa pag inom sa biktima sa illegal nga drugas.

Naa na usab ang orihinal nga kopya sa resulta sa autopsy sa patayng lawas sa biktima ug gitakda kini nga ipakita sa mga ginikanan niini aron mapasabot unsay gikamatyan.

Makita usab matod pa sa resulta sa autopsy kung pila ka dosage ang giinom sa dalaga nga maoy hinungdan nga nag malfunction ang iyang mga internal organs.

Wala mo supak si Gen. Sinas sa pamahayag sa abogado ni Tiu sanglit ilaha man usab kining bersyon sa hitabo ug wala usab kini mo luwat sa pinanumpaang pamahayag.