TUNGOD kay anibersaryo sa Edsa People Power Revolution karong umaabot Lunes, Pebrero 25, wala’y klase ug kasagaran wala’y trabaho.
Apan ang Department of Labor and Employment (DOLE) 7 nipahinumdom sa mga aduna’y trabaho sa maong adlaw nga magdawat sila og dugang 30% sa ilahang sweldo anang adlawa.
Subay sa Labor Advisory No. 03, Series of 2019 makadawat og sumatotal 130% sa ilahang basic daily rate ang mga patrabahuon sa maong holiday.
“If a worker is asked to render work on February 25, he or she must be paid an additional 30% of his or her basic wage on the first 8 hours of work,” matod ni DOLE 7 Regional Director Atty. Johnson Cañete.
Hinuon alang sa wala’y trabaho nianang adlawa, sundon gihapon ang palisiya sa kompanya nga “no work, no pay.”
Ang maong labor advisory subay kini sa Proclamation No. 555 nga gipirmahan sa presidente ug giisyu niadton Agusto 2018.