SECTIONS
Monday, April 22, 2019
SUPERBALITA CEBU

Diputado: “Ang drama”

Cuentas claras

NASOBRAHAN ra pod pagka-OA kini si Maria Ressa, ang pangulo sa Rappler nga bag-o pa lang gidakop tungod sa kaso nga cyber-libel.

Tungod kay gidakop siya, hilabihang batikos niya sa pamunoan ni PRRD tungod sa matod pa niya, hulga sa katungod sa prensa.

Angay kuno magmata og maghiusa ang katawhan tungod sa pagpanglupig o pagdaog-daog sa iyang tawhanong katungod sa gobierno nga gidumala ni PRRD.

Susmariosep.

Nabulilyaso lang siya sa iyang gipatik nga balita, sa dihang nagpagawas siya sa usa ka news report nga napamatud-an nga sayop diay, daghan na siyag tagawtaw.

Ang nakaparat ra ba kay imbes angkonon niya ang iyang sayop, nga mao ang pagpublikar sa balita nga sayop nga nakapaulaw sa usa ka negosyante, nag-drama na hinuon si Maria Ressa.

Abusar na man nang iyang gihimo.

Gikiha siya sa negosyante sa kaso nga cyber-libel tungod sa iyang gipatik nga balita.

Giakusar siya nga nakahimo og dakong pagpakaulaw sa maong negosyante sanglit dili man diay tinuod og tumotumo lang ang maong balita.

Human sa imbestigasyon nga gihimo sa Department of Justice, gipasaka ang kaso og gi-isyohan og warrant of arrest si Maria Ressa.

Buot ipasabot, dunay basehan ang pag-isyo sa warrant of arrest.

Kay misipyat man siya, angayan lang nga manubag siya sa iyang sayop.

Apan unsay gihimo ni Maria Ressa?

Nag-drama og gibatikos ang kagamhanan.

Mao kini ang problema ni Maria Ressa.

Misipyat siya sa iyang trabaho sanglit ang unang balaod sa panulat mao man ang pagseguro nga husto ang iyang gipatik nga balita.

Kon dili segurado sa usa ka butang, undangon ang pagsulat sa maong balita hangtod dili masusi ang katinuod niini.

Wala kini buhata ni Maria Ressa sanglit milutaw man nga sayop ang iyang gipatik nga balita.

Apan imbes angkonon niya ang iyang sayop, og mangayo lang og pasaylo, maisogon lang gihapon nga gibarogan ni Maria Ressa ang iyang gipatik nga balita.

Angay undangon na kining drama og magpaka-babaye siya nga moangkon sa iyang bulilyaso.

Unya karong bag-o lang, gi-akusar ni Rigoberto Tiglao nga si Maria Ressa usa diay kuno ka US citizen sanglit gisalikway na niini ang iyang pagka-Pinoy sa dugay na nga panahon.

Gani, matod pa ni Tiglao, gigamit ni Maria Ressa ang iyang US passport sa makadaghan nga panahon sa iyang pagbyahe-byahe sud ug gawas sa atong nasod.

Tinuod ba kini?

Angayan lang nga klarohon kini ni Maria Ressa. Angayan lang nga mosulti siya sa katawhan og tinuod ba kining gisulti ni Tiglao bahin sa iyang pagka-tawo.

Angay sab nga tubagon ni Maria Ressa ang kiha batok kaniya.

Kon ang ordinaryo nga journalist nga dili parehas ka ilado ni Maria Ressa dakpon kon masayop sa ilang napatik nga balita dayon prisohon kon dili maka-pyansa, angay lang nga ingon ani usab ang buhaton kang Maria Ressa.

Adunay kandidato pagka-kongresman nga nailhan na nga mahilig magpa-cute cute kon mosulti na atubangan sa katawhan nga adunay laing klase nga drama.

Nagtuo siya nga ang iyang boto sa pagka-bokal mao ra usab ang iyang boto nga makuha kon mokandidato siya pagka-kongresman.

Tungod niini, isog siya nga mi-file og COC pagka-kongresman, bahala og linghod pa ang iyang pangedaron.

Sa nagsigi na siya og suroy-suroy para mangampanya, iyang nahibaw-an nga walay epekto diay ang iyang pa-cute-cute sanglit mas gusto makita sa mga katawhan ang iyang nahimo pagka-bokal, labi na kon mohatag pod siya og kwarta para inom o pang-snacks.

Nahibaw-an niya karon lang nga kon dili siya manghatag og kwarta, way mga tawo nga motapok o moduol kaniya aron maminaw sa iyang pa-cute-cute nga diskurso.

Pagka-dako sa iyang magasto kon buhaton niya kini sa tanang panahon.

Tungod niini, nakahuna-huna siya og usa ka drama.

Moundang siya pagka-kongresman kon bayran siya og P200 milyon.

Asa ka mangahoy ana?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!