MAAYO man kon ilisan nato ang pangalan sa atong nasod nga Pilipinas ngadto sa Maharlika, basi sa sugyot ni Presidenti Duterte. Apan, duna ba gyuy dakong panginahanglan aron atong usbon ang pangalan?
Unsa may motibo ni Duterte aron bag-ohon nato ang pangalang Pilipinas?
Mosugot mo nga tawgon na ta og Maharlikan inay mga Pinoy o Filipino?
Tinuod, importanti kining pangalan ug dako ug kahulogan ang pagmintenar nga limpyo atong pangalan. Kon maduhigan og hugaw ang ngalan, lisod na gyud kaayo bakwion aron mabalik ngadto sa iyang kahalangdon.
Sama sa ubang nasod, ang Pilipinas nag-atubang kanunay og daghang pagsulay ug hagit sa nawong sa kalibutan. Nabaniog atong nasod sa iyang kadaghan og mga talento nga lisod matupngan ang kalidad.
Daghang mga Filipino nga misidlak tungod sa ilang katakos ug abilidad.
Duna say salawayon ug gikondinar sa kadaghanan ug giyam-iran sa komunidad sa kalibutan.
Bisan dugay pa kini mahitabo, apan kon iduso gyud sa gobiyerno kining pag-usab sa Pilipinas ngadto sa Maharlika, dako kining sagubangon, dili lang sa gobiyerno apan mismo sa yanong molupyo. Ngano man?
Sa ato lang mga papeles ug dokumento magkinahanglan kana og kausaban sa pangalan. Nagpasabot, tanang dokumento gikan sa gobiyerno o pribado, usbon ang tanan, wagtangon ang pangalang Pilipinas ug hulipan sa Maharlika.
Hunahunaa lang unsa ka hasol unya pag-ilis sa imong passport, driver’s license, birth certificate, ug uban pang importanting mga dokumento nga magpamatuod sa imong pagkatawo. Kay kon dili kana mabag-o ug mausab, kinsa bay moila nimo nga taga Pilipinas ka nga wa naman sa mapa sa kalibutan ang Pilipinas.
Bitaw, molanat kana og taas nga panahon pag-usab sa pangalan ug labaw sa tanan magkinahanglan kana og dakong pundo.
Pero, atong tuohan gyud nga bisan unsa pa kaanindot sa pangalan, bisan ipahaom pa nato sa labing dalaygon nga mithi, kon ang nagbaton sa pangalan salawayon gihapon, walay kausaban nga mahitabo.
Matod ni Duterte ang pangalang Maharlika naggikan sa Malay nga pulong nga “kalinaw”. Apan, kining Pilipinas, gikuha kini agig pagtahod ni Haring Felipe sa Espanya nga miokopar sa atong nasod sulod sa tulo ka siglo.
Duna nagtawag sa ilang kaugalingon nga Kristiyanos, apan panid-i ilang kinaiya, dili nimo makita diha kanila ang kinaiya ni Kristo.
Busa, dili diha sa pangalan, apan diha sa pagkatawo matimbang nato unsa kabug-at ang kaayo batok sa kadaotan sa usa ka butang o tawo.
Mas maayo hingusgan pa ni Duterte ang pag-usab ug pagbag-o sa sistema sa gobiyerno nga naduhigan pag-ayo sa pangurakot kay sa pag-ilis sa pangalan nga Pilipinas.