NAKAHILAK paghandom ang pipila ka mga residente sa Sitio Green Valley, Barangay Dalwangan, dakbayan sa Malaybalay, dihang gibalik-balikan ang nahitabong pagpangatake sa walhong grupo niadtong adlaw sa Valentine’s Day.
Atol sa local nga meeting sa mga residente mga alas 3 sa hapon niadtong adlawng Lunes, Pebrero 18, ilang gideklarar nga dili makatarunganon ang gipanghimo sa mga walhong grupo sa New People’s Army (NPA) ug gihangyo nga dili na manghasi sa ilang lugar.
Ang pagpangatake sa walhong grupo sa patrol base sa tiilan nga bahin sa Mt. Kitanglad nagbilin og unom ka mga nakalas ang kinabuhi, upat sa kampo sa NPA ug duha sa mga sundalo.
“Nganong kinihanglan pani mahitabo? Ang giatake nila ang mga sundalo nga pagkamaayo sa amoa?” matud sa usa ka mag-uuma.
“Grabe akong kurog, naghapahapa jud mi aron matabunan mong anak, nanuktok sila sakong balay, abi nakog sundalo kay naka uniporme, tabang Lord NPA man diay, gusto gamiton among sakyanan,” dugang pa sa mga residente.
Giingong niabot ang NPA tuig 2007 apan walay natabang kanila.
“Dili na sila pabalikon dinhi, putlon na tanan koneksyon nila. Itext ang sundalo masayran nga duol sila, bantayan man tag mga sundalo!” dugang niini.
Aduna sab usa ka “pahina” o bayanihan ang nga gihimo kon diin ilang gitabangan ang wala pa natapos nga patrol base.
Atol sab sa ilang panagtigom aduna silay gibutang nga placard sa ilang lugar nagsulti nga: “No to NPA,” “misuporta mi sa Martial Law,” ug “NPA are Terrorists.”