Wa pay LGU mideklarar og dengue outbreak

WALA pa’y bisan usa ka lokal nga kagamhanan sa Central Visayas ang mideklarar og outbreak sa kaso sa dengue sa ilang tagsa-tagsa ka lugar.

Kini mao ang gibutyag sa pangu sa Regional Epidemiology and Surveillance Unit (RESU 7) nga si Dr. Shelbay Blanco.

Kahinumduman nga mipahibawo ang Department of Health Central Visayas Center for Health Development (DOH-CHD 7) nga siyam ka lugar sa rehiyon ang gi-rekomendar sa ahensiya nga modeklarar og outbreak sa kaso sa dengue.

Apan matod ni Blanco nga anaa sa LGU kung magdeklarar ba sila o dili.

Lain usab nga ilang gitan-aw nga rason og nganong wa usab sila modeklarar og outbreak sanglit ang pipila sa lugar gidagsa sa mga turista ug posible unyang maapektuhan ang turismo sa maong mga lugar.

Si Dr. Elizabeth Gamolo, ang assistant regional director sa DOH-CDH 7 nagkanayon nga wala pa siguro kini gitan-aw sa mga lokal nga kagamhanan tungod makaya pa nila ang pag-atiman sa mga kaso sa ilang dapit.

Padayon gihapon gi-monitor sa ahensiya ang mga kaso tungod usab sa pagdaghan pa sa mga kaso nga natala.

Sa labing ulahing datos sa RESU 7 kagahapon, anaa na sa 3,681 ka kaso sa dengue ang anaa karon sa rehiyon.

Adunay nadugang nga upat nga namatay gikan sa 24 nga natala sa nakalabayng semana.

Sa kinatibuk-an, anaa na sa 28 ang natala nga namatay sukad Enero 1 hangtod Pebrero 19 karon tuiga.

Nag-una gihapon ang siyudad sa Sugbo sa gidaghanon sa kaso nga adunay 430 nga gisundan sa siyudad sa Lapu-Lapu nga adunay 361 ka kaso. Samtang sa Mandaue adunay 206, Dumaguete nga adunay 114 ug ang Danao City nga adunay 82.

Awhag sa mga kadagkuan sa DOH 7 nga ipadayon gihapon ang pagpalimpyo ug pagpatuman sa 4S kon search and destroy, self-protection measures, seek early consultation, and say no to indiscriminate fogging.