Mohatag mo og drug watch list o pasakaan mo og kaso

MGA brangay opisyal sa dakbayan sa Mandaue ang gipasidan-an nga posibleng mag-atubang og kaso gikan sa Philippine Drug Enforcement Agency (PDEA) ug sa Department of Interior and Local Governement (DILG) kon dili gihapon makahatag sa ilang mga BADAC drug watchlist.

Samtang tanang barangay sa Syudad ang gitug-an sa director sa Mandaue City Police Office nga apektado gihapon sa ginadili nga drugas.

Sa 27 ka mga barangay sa Dakbayan sa Mandaue, gipahibaw sa taga PDEA-7 nga hangtud karon duha pa lang sa mga barangay ang nakahatag kanila sa bag-ong Barangay Anti-Drug Abuse Council (BADAC) drug watch list.

Gipahibaw kini, Martes sa buntag, Pebrero19, nga atol sa gihimo nga DILG coordination meeting may labot sa pagbatok sa ginadili nga drugas, nga gihimo diha sa conference room sa Mandaue City Police Office.

Hinungdan nga nipasidaan sila nga tinud-on ang balaud kalabot sa dili makahatag. Mapasakaan gyud og kaso ang mga barangay opisyal, sa kaso nga Dereliction of duty ngadto sa buhatan sa Ombudsman nga kon mapamatud-an, mamahimo sila nga masuspenso.

Gipahibaw kini ni MCPO director Senior Supt. Julian Entoma. Hinuon anaa pa silay kapin sa usa ka bulan nga makasumite, kay sa Marso 31 man ang deadline.

Gitug-an ni Entoma nga agig tubag usab sa awhag ni Mandaue City Vice Mayor Carlo Fortuna, atol sa ilang City Peace and Order Council meeting, kalabot sa barangay drug clearing, gitug-an ni Entoma nga maglisud gyud sila nga adunay madeklarar bisan usa nga barangay.

Kay ang tanan nga 27 ka mga barangay sa dakbayan sa Mandaue ang padayon nila nga i-rekomendar sa PDEA nga ubos sa moderately affected sa ginadiling drugas.

Hinuon usa sa paagi nga ilang nasabutan, mao ang pagsugod diha sa purok sa matag barangay.

Aron magsugod pa lang sa Purok, masuta kon grabe ba nga apektado, o adunay mga lugar sa usa ka barangay, nga way namaligya ug wa usab manggamitay sa ginadili nga drugas.

“So karon among sulayan ni nga down to the Purok, among i-try nga i-capacitate lang gyud sila, amo ipa-undergo og seminar ug orientation kalabot sa ilang mga role sa purok leader, para at least makatabang sila sa barangay. Ang kapitan mismo maoy mo- decide kinsa ang ilang mga purok leader.

Gihisgutan ganiha nga ang atong mga kapitan kinahanglan gyud mo-submit sa ilang BADAC watch list,” asoy ni Entoma.

Giklaro sa director sa MCPO nga ang padayon nga pagkaubos sa moderately affected sa mga barangay sa Mandaue City, gawas sa mga drug surenderer diha sa mga barangay, tungod usab sa daghan nga mga dakup nga nahimo sa kapulisan sa mga pusher ug user.

Dugang giklaro nga kasagaran usab sa mga nadakpan naggikan ang drugas sa silingang nga mga syudad ug lungsod.