USA ang nag-positibo sa surprise drug test sa 180 ka mga personnel sa City Social Welfare Services sa Dakbayan sa Mandaue.
Samtang negatibo usab ang tanang 173 ka mga pulis sa Mandaue City Police Office headquarter sa linain nga kinalit nga drug test niadtong Pebrero 18.
Gihimo ang surprise drug test sa buhatan sa CSWS ug Hope of Mandaue Enhanced (HOME) Children’s Center sa Pebrero 19.
Gitug-an ni Jessie Perez, pangulo sa CSWS nga ang nagpositibo usa ka lalaki nga job order employee su’d pa lang sa kapin usa ka tuig.
Hinuon ipaubos pa kini sa confirmatory test, apan giduso na nila ang ngalan og resulta sa drug test ngadto sa Mandaue City administrator’s office, aron sila nay mohimo og desisyon kalabot sa maong kawani.
Sa 180 ka mga kawani sa CSWS, 49 kanila mga magtutudlo sa day care sa tibuok syudad, ug laing 30 ang diha na-assign sa Home, nag-atiman sa mga bata nga nadakpan tungod sa mga dagko nga kaso.
Gitug-an ni Perez nga nihangyo siya sa City Health Office alang sa kinalit nga drug test, isip pagsunod sa mando ni Mayor Luigi Quisumbing ug sa kampanya sa gobyerno pagsiguro nga wa’y mga kawani nga nalambigit sa ginadiling drugas.
“We wanted to comply with the City’s anti-drug campaign. Permanente gyud nato sila gi-remind, every time nga mag-meeting mi, gi-remind gyud nato na nga do not involve yourself sa illegal drugs ka yang City kusog kaayo nga nangampanya batok sa ilegal drugs.," pagpasabot ni Perez. (FMD)