PANGULOHAN sa mga higante sa Sugbo nga sila si 7-footer Greg Slaughter sa Brgy. Ginebra Gin Kings ug 6’10” JuneMar Fajardo sa San Miguel Beermen ang starters sa South Team alang sa umaabot nga 2019 Philippine Basketball Association (PBA) All-Star Game.
Gawas duha ka dekalidad nga mga sentro sa liga, ang ubang starters sa South mao sila si James Yap sa Rain or Shine Elasto Painters, Mark Barroca sa Magnolia Ang Pambansang Manok Hotshots ug Scottie Thompson sa Brgy. Ginebra.
Ang laing mga sakop sa Brgy. Ginebra nga sila si LA Tenorio ug Japeth Aguilar mao ang mangulo sa starters sa North squad.
Mokompleto sa starters sa North mao sila si Paul Lee sa Magnolia, Calvin Abueba sa Phoenix Fuel Masters ug Marcio Lassiter sa San Miguel.
Wala pa masayri kon kinsa ang mapili nga reserbang mga magduduwa alang sa South ug North.
Apan kon basihan lang ang starters sa duha ka mga kampo, pinaspasay batok duwa sa ilawom ang gilaumang masaksihan ning engkuwentruha.
Kon pinaspasay ang duwa, labing seguro makapabor ang North apan seguradong manghawod sab ang South sa ilawom nga bahin tungod sa presensya nila ni Slaughter ug Fajardo nga naila nga dugay nang managribal gikan pa sa panahon nga nagduwa pa sila sa kolehiyo.
Ning tuiga, gibalik sa PBA ang karaang format sa All-Star Weekend diin ipahigayon lang kini sa usa ka venue.
Ang 2019 nga edisyon sa gikaintapang duwa ipahigayon karong Marso 29-31 sa Calasiao, Pangasinan.
Sa miaging duha ka mga tuig, ang All-Star Weekend gipahigayon sa tulo ka venues sa Luzon, Visayas ug Mindanao. (ESL)