GIPAMATUD-AN sa Alab Pilipinas nga kaya nilang mobarog bisa’g wala ang ilang 7’3” nga higanteng si PJ Ramos pinaagi sa pagmakmak sa Zhuhai Wolf Warriors sa China, 108-81, niadtong Dominggo sa gabii sa Asean Basketball League (ABL) Sta. Rosa gym sa Laguna.
Nagkumboya sila si import Renaldo Balkman, Ray Parks Jr. ug Caelan Tiongson aron tapakan ang haw-ang nga nabiyaan ni Ramos, kinsa napahamtangan og usa ka duwa nga suspensyon.
Si Balkman nagpakatap og 20 puntos ug siyam ka assists aron pangulohan ang kadaugan samtang nidugang og 14 puntos si Tiongson.
Pagsugod pa lang sa duwa, ang Alab Pilipinas ningkontrolar na dayon sa duwa ug nakamugna kini’g 19-9 nga labaw pinaagi sa 13-0 run nga gitambayayungan pagmugna nila ni Balkman, Tiongson ug Parks Jr.
Human niini, wala na molingi pagbalik ang Alab Pilpinas hangtod na pagkahuman.
Ang Alab Pilipinas mingsaka sa 15-3 nga rekord samtang ang Wolf Warriors nangahagbong sa 2-17 nga baraha.
Kini maoy ikaduhang higayon nga ningkombati ang Alab Pilipinas nga wala si Ramos.
Sa premirong higayon, ang Alab Pilipinas napilde batok sa Hong Kong Eastern. (ESL)