GIPANGULOHAN nila ni commissioner Willie Marcial ug board chair Ricky Vargas ang delegasyon sa Philippine Basketball Association (PBA) nga ninglarga kagahapon paingon sa Doha, Qatar aron mohatag og moral nga suporta sa Team Pilipinas alang sa 6th window sa 2019 FIBA World Cup Asian qualifiers.
“I have talked to coach Yeng Guiao, and he is confident we can win and make the World Cup. And I believe him,” matod ni Marcial sa Spin.ph.
Ang tanang mga miyembro sa PBA board, gawas lang ni Rene Pardo sa Magnolia, nahilakip sa delegasyon sa PBA nga personal nga moabiba sa Team Pilipinas sa pagpakigsangka niini sa Qatar ugma.
“We all know that the team is made up of PBA players. So the entire board is flying to Qatar to support the team. We all know in the board how important these two games are for us. We want to win these games,” batbat ni Al Panlilio, represnetante sa Meralco sa PBA board ug presidente sa Samahang Basketbol ng Pilipinas.
Nanghinaot si Panlilio nga ang mga Pinoy nga naa sa Qatar mosuporta sa Team Pilipinas gumikan kay dako kini og ikatabang aron magmadasigon ang mga sakop sa team.
Gawas kang Blatche, ang ubang mga sakop sa Team Pilipinas mao sila si June Mar Fajardo, Japeth Aguilar, Poy Erram, Raymond Almazan, Troy Rosario, RR Pogoy, Marcio Lassiter, Gabe Norwood, Paul Lee, Scottie Thompson, Mark Barroca, Jayson Castro ug Gilas cadet Thirdy Ravena.
Apan dili pa makaduwa si Pogoy batok sa Qatar gumikan kay kasamtangan pa kining suspendido sa FIBA.
Hinuon, ang lumad nga Sugbuanon makaduwa na sunod tahas sa Team Pilipinas batok sa Kazakhstan karong Pebrero 24. (ESL)