Dear Atty. Joan,
Ako diay si Jerry. Naa koy anak nga padung na syete anyos. Ang akong anak kay babae pero karon lang namo nabantayan nga sa iyahang birth certificate (BC) kay ang nakabutang kay “male.”
Karon ra gyud mi nakabantay kay karon ra mi ning kuha og iyang BC para maandam namo para nig eskwela niya.
Pwede pa ba ni namo ipausab? Unsa ang angay namo buhaton?
Jerry
Dear Jerry,
Pwede pa ni nimo mapausab. Dili na kinahanglan na muadto pa mo sa korte para mausab ang sayop nga pagbutang nga “male” sa BC sa imong anak na babae.
Basi sa imong gisaysay, ang pagbutang nga “Male” sa BC sa imong anak kay usa ka typographical error lang, ug dili ni tungog sa pag-usab sa kinatawo sa imong anak.
Sulod sa Republic Act 10172, adunay gahom ang mga naa sa local civil registrar nga mousab sa “sex” sa usa ka tawo kung kini para usbon ang sayop nga pagkatala sa record of birth mahitungod sa usa ka typographical error.
Kinahanglan magpasang-at ug request paagi sa usa ka sumpahayag. Kini dapat inubanan sa lain pang mga dokumento (school records, baptismal certificate, etc.) nga pwede basehan kung unsa ang angay ibutang sa record.
Kinahanglan sad magpakita ang hingtungdan ug usa ka sertipikasyon gikan sa usa ka government accredited physician nga nag-ingon nga ang maong bata o tawo kay wala niagi ug aktwal nga pag-usab sa iyang kinatawo (sex change).
Ang request kay ipasaka sa local civil registrar kung asa nakarehistro ang maong record.
Hinaot nga nakahatag ko og giya kanino.
Atty. Joan