MIUROS ang iyang mga mata. Misamot kini dihang gisugniban ang iyang tinan-awan sa kamatuoran nga iyang nakita. Di siya makatuo. Nagpinal si Lola niya Barang. Hapit kini kabugtoi sa higot sa hangin sa iyang gininhawa. Tin-aw nga kini naghingutas. Si Nanay niya Pina nagdali kadto nga makaabot kang Albularyo Lucas sa di pa moadto sa iyang umahan sa bungtod.
“Bilin ka dinhi, Sany, kay dalion ko pag-adto si Noy Lucas aron maluwas pa ning apuhan mo.”
Nahabilin siya nga mahimong testigo sa kamatayon sa iyang apuhan. Apan wa siya batia sa kahadlok bisan sa iyang nakita karon nga nawong, nga ang mga mata siga kaayo nga naglupad nga milabay sa bentana. Wa kiniy lawas pulos lang nawong ang iyang nakita.
Naghunahuna siya karon sa gisulti ni Mario Sagisag nga batid sa okultismo.nga ang demonyo naa sa kiliran sa tawo nga himatyon.
“Ang imo lang buhaton ang pagyawyaw niining mantra. Mongaab na siya ug di na pakita, apan kon may ‘power’ o gahom ang himatyon, igo lang nang mongisi.”
Gitutokan niya ang bentana kon moagi pag-usab ang nawong sa demonyo. yawyawon dayon niya ang mantra. Angay unta nga di tuohan ang patuo-tuo, apan may kamatuoran siyang nakita. Nahitabo ang gipang-estorya sa libro sa okultismo nga iyang nabasa ning pagduaw niya sa banika karon. Ang mag-ubo nga iyang nadungog sa tungang gabii nga way tawo. Ang katawa sa tumoy sa bungtod nga siya ray nakadungog. Karon ang nawong sa demonyo nga nagpakita.”There are bad spirits around that could test the integrity of your beliefs.” matod sa libro.
Nag-atang siya. Sukdon niya ang iyang kaisog. “ The only thing you have to fight the evil spirits is your courage.” Kanunayng mopahinumdom si Mario kaniya nga maoy iyang professor sa iyang ‘elective subject’ nga Wild Divinity.
“Kon mowara-wara ang kamot ni Nanay, ayaw gyug hikapa.” Pahinumdom sa iyang inahan. Kalit may mitaghoy sa bentana nakita niya pag-usab ang makahahadlok nga nawong, Giyawyaw niya ang mantra. Miuknol ang nawong nga nagdilaab na ang mga mata. Giharong niya sa pagtan-aw ang nawong nga karon nagngisi. Unya, miagulo ang iyang lola, giisa ang kamot ug giwara-wara. Dugay siyang mitutok sa demonyo. Milingiw kini ug milupad nga nanaghoy. Pagtan-aw niya sa iyang lola wa na kini motingog. Gihikap niya ang kamot bugnaw kini ug wa nay pulso. Patay na ang iyang lola. Maoy pag-abot sa iyang inahan.
Gipangutana siya kon gidawat ba niya ang kamot dihang miwara-wara kini. Milingo-lingo siya. “Salamat, Sany. nga wa nimo hikapa ang kamot dihang miwarawara kay ikaw unta ang makasunod sa iyang gahom nga mamarang.”
Nahiuknol siya sa iyang nadungog. Gitutokan niya ang iyang inahan.nga wa gyud mosulti kaniya sa tinaguan sa ilang kaliwat. “Mao gyud ni ang akong gilikayan nga makasunod sa abilidad ni Nanay kay binuhatan na sa demonyo.” Nakasabot siya nga kadtong paglakaw sa iyang inahan pasangil lang diay to.
Gipaningot siya bisan bugnaw ang kahapunon. (KATAPUSAN)