PARA nako, gihimo sa tulo ka mga nurse sa district hospital sa lungsod sa Tuburan ang tanan pinaagi sa pag-atiman sa drug suspect nga si Jimby Casas, nga napusilan sa kapulisan.
Gani makita man sab ang security guard sa ospital nga nakasuot og gloves nga kon buot sabton miabag sa mga nurse aron maluwas ang pasyente.
Apan unsaon sa pagtabang nga morag lisud nga maluwas ang pasyente tungod sa grabing mga samad pinusilan.
Makita man sa video nga gi-upload sa social media nga anaa ang nga nurse nag-asikaso sa biktima.
Naa man sab gani ang security guard sa ospital nga nakasuot og gloves isip timaan nga miabag kini sa mga nurse.
Kon wa pa makauniporme ang guard maala-an man gani nga mora sab og doktor kon imong pasul-obon o puti nga uniporme.
Ang sayop ra gyud sa tulo ka mga nurse ang pagkuha og video ug pag-upload sa social media nga usa ka kalapasan sa right to privacy ngadto sa pasyente.
Sa pagkakaron nasuspenso na ang mga nurse. Na-ospital si Casas dihang misukol sa gihimong buy-bust operation sa kapulisan.
SALVADOR UG CATAN
Samtang nadismaya si Provincial Board Member Tata Salvador, chairman sa committee on health, sa pag-video sa mga nurse.
Apan iyang gipanalipdan pinaagi sa pag-ingon nga gibuhat sa mga nurse ang ilang trabaho sa pag-atiman sa pasyente.
Si Salvador nga nahimabi sa Agila ug mga kauban sa media mipahibawo nga nadismaya si Dr. Catan ang pangulo sa Provincial Health Office sa Capitol.
Kay matod pa ni Salvador, miingon si Catan tungod ani nga kaso madaot unya ang maayong panerbisyu sa kinatibuk-ang nagtrabaho sa ospital.
Ang provincial ug district hospital maoy usa sa gitagaan og prayoridad sa pagpalambo aron maserbisyuhan ang kabus nga mga pasyente.
GIPAMULITIKA ANG ISYU
Karon ang isyu sa tulo ka mga nurse gigamit nga isyu karon sa pulitika sa kampo sa kontra ni Tuburan Mayor Aljun Diamante ug Bise Mayor Danny Diamante.
Si Aljun ug Danny mihimog programa sa panglawas sa mga lumolupyo sa bukirang barangay pinaagi sa outreach program nga gisabak sa One Stop Shop.
Ug way labot ang managsuong Diamante sa pagpadagan sa district hospital kay ubos man kini sa PHO.
Samtang aduna nay pagpatin-aw niini si Dr. Catan.
Tungod sa pulitika, gikabay-an ang isyu sa kaatbang sa kontra sa pulitika nila ni Gob. Hilario Davide III ug Bise Gob. Agnes Magpale.
Ang Tuburan, pinaagi ni Diamante, ginamit sa kapulisan mikampanya batok sa problema sa drugas. efrenlonzon71@gmail.com ug 09235562777