SUPERBALITA CEBU

Editoryal: Di matuis, magwais

Editorial Cartoon by John Gilbert Manantan

Ning nagkaduol ang eleksiyon sa Mayo 2019, ang mga politiko nga mapahitas-on ug madinomtanon atong namatikdan nga mapahiubsanon na. Mag-una sa pagpanglamano. Mapahiyumon ug mura’g nakaila kanimo. Daghang ipanghatag nga regalo o hinabang kunohay apan dunay dakong nagpaluyong hinungdan-ang inyong boto.

Maayong igmat kita aron dili malunod sa pagpanobra sa mga beteranong politiko. Ang hunahuna ug pagbati sa masa buot makuha. Hinuon, nindot man sad ni nga kahimtang. Bisan sa hamubo lang nga higayon taliwala sa pagpakarong-inon, ang mga kabus nga lungsoranon makasinati sa maayong pagtagad. Makaambit sa bahandi gikan sa nagharing hut-ong.

Gawas sa igmat, dili usab seguro sayop nga magwinais kita nga modawat sa benepisyo. Basta dili lang matuis ang atong baroganan sa pagpili sa insaktong lider nga hatagan sa imong balaang boto. Hinuon, walay problema kon ang nagtunol sa grasya mao ang imo nang gipili.

Pananglitan, ang gikatakdang pagpanghatag ni Mayor Tomas Osmeña og usa ka sakong bugas humay sa matag drayber sa habalhabal sa dakbayan sa Sugbo karong Sabado, Pebrero 23, sa Plaza Independencia way problema. Sumala ni Atty. Marchel Sarno, election officer sa north district sa dakbayan, way balaud nga malapas human ang election campaign period sa local candidates karong Marso 29 pa magsugod.

Si Osmeña nisugyot og gahin nga P15 milyones gikan sa Pagcor funds alang sa naasoyng katuyoan. Giaprobahan sa City Council pinagulohan ni Bise Mayor Edgardo Labella, presiding officer. Sumala sa naulahi, nisuporta siya sanglit gikinahanglan kini sa mga drayber sa habalhabal.

Ang operasyon sa habalhabal gideklarar sa Korte Suprema nga ilegal. Nganong drayber ra man sa habalhabal ang hatagan og bugas? Nganong karon na lang? Klarong winais. Busa dili usab magpatuis sa baroganan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph