TAGUM CITY -- Talandugon ang kahimtang sa usa ka 25-anyos nga dalaga human dunggaba sa giingon niining boyfriend sud sa usa ka pasaheroang bus didto sa Tagum Overland Transport Integrated Terminal sa Barangay Magugpo West, Martes sa udto, Pebrero 19.
Sa hulagway nga gi-post sa netizen nga dunay pangalan nga Ren Ren, makita nga nagtaop pa ang kutsilyo sa dughan sa babaye nga si Apple (bansagon gitago), 25, nagpuyo sa Purok Ilocandia, Mankilam, ning siyudad.
Samtang gihulat ang mga miresponde nga sakop sa City Disaster Risk Reduction Management Office (CDRRMO), wala na naglihok ang biktima diin nagtaop sa dughan ang kutsilyo nga dunay gitas-on nga dose ka pulgada ug dunay kolor orange nga puloan.
“As alleged nagbikil sila sa iyang uyab, diin padung ang victim sa Davao City, unya naapsan kini sa terminal, mao tong gisaka sa bus, gidunggab sa suspek,” saysay ni Senior Inspector Anjanette Tirador, spokesperson sa Tagum City Police Office.
Dugang ni PSI Tirador nga wala pa nasikop ang suspek apan ilaha na kining nailhan.
“So far at large ang suspek, pero atoa na kining na-identify, manhunt operation ang gihimo karon sa Tagum PNP,” ingon ni PSI Tirador.
Dugang nasayran gikan sa opisyal nga ex-live in partner sa biktima ang suspek, diin nagkabalik sila ug nahimo nalang niya kining boyfriend.
Wala sab masaysay kung unsay ugat-hinungdan nga gikasuko sa suspek nga misangko sa ingon niini nga kremin.
Sa kasamtangan ang biktima anaa sa operating room sa Davao Regional Medical Center sa Tagum City gumikan sa kalawom sa samad nga nahiagoman niini. (Jeepy P. Compio)