LABING una nga edipisyo sa Land Transportation Franchising and Regulatory Board (LTFRB-7) ang tukoron nga mahimutang sa dalan General Echavez, Barangay Lorega, San Miguel, Cebu City.
Ang maong building nga nagkantidad og P66.8 milyones gisubhan kagahapon, Pebrero 19 diin sila si Presidential Assistant for the Visayas Michael Dino, LTFRB-7 Regional Director Eduardo Monteleato, Jr. ug LTFRB Chairman Atty. Martin Delagra III ang nangulo sa maong kalihokan.
Sukad na mugna ang LTFRB niadtong tuig 1987, ang rehiyon 7 wa nakabaton og kaugalingong opisina ug igo lang kini sa pagpangabang og lugar.
Ang kasamtangang opisina sa LTFRB-7 kanhi warehouse nga adunay gidak-on nga 600 metro kuwadrado.
Matod pa ni Atty. Delagra nga ang maong groundbreaking ceremony usa ka makasaysayonon nga panghitabo kay sud 32 kat uig makabaton na ang rehiyon og kaugalinogon ug permanete nga opisina.
Ang maong building nga itukod adunay gidak-on nga 2,200 square meters nga adunay tulo ka andana ug adunay roof deck nga mas lapad itandi sa kasamtangang lugar nga gi-abangan sa LTFRB.
Gihangop sa maong opisyal ang maong kalambuan kay sa matukod na ang building mamahimo na unyang komportable ang mga kliyente sa ilang buhatan.
Dako ang pasalamat sa LTFRB7 ngadto ni Presidente Rodrigo Duterte sa pagsuporta sa maong proyekto.
“Kabalo ta nga katong LTFRB diha nga duol sa pier, warehouse to siya. Init unya kung mo-uwan bahaon, maluoy ta sa atong mga kliyente nga mga transport groups, even those people who would come to complain and seek for any transactions,” matod pa ni Delagra.
Panghinaot ni Delagra nga masugdan gilayon sa kontraktor ang katukoran sa labing dali nga panahon ug gibana-bana nga mahuman sulod sa 360 ka adlaw, apan mas bintaha nga mahuman kini sulod sa walo ka buwan.
“Once the building was finished, we will move in here and we will be able to save as much as 89,000 pesos a month, in terms of rental,” pulong pa sa LTFRB chairman.
Samtang si director Monteleato mibutyag nga aduna silay paliton nga 8,000 metro kuwadrado nga luna sa dakyabayan sa Lapu-Lapu nga magsilbing impounding area sanglit ang edipisyo nga tukoron gitagana lang alang sa transaksiyon. (Kiziah Marie T. Suello, USJ-R Intern)