USA ka kasabutan sa pagmatyag og malinawon nga eleksyon gilusad Martes, Pebrero 20, sa Siyudad sa Naga. Pipila ka mga kandidato ang nipirma sa “peace covenant.”
Ang mga kandidato sa Liberal Party sama nila ni Agnes Magpale ug Hilario Davide III, kinsa magpapili pagka gobernador ug bise gobernador, wa makatunga atol sa panaglagda tungod kay, matod pa, aduna silay kabilinggan sa lungsod sa Malabuyoc ning tungora.
Giunhan ang peace covenant signing og usa ka “unity walk” duol sa Naga City Hall ug dayon usa ka misa sulod sa Archdiocesan Shrine of St.
Francis of Assisi nga giselebrar ni Fr. Orly Ruiz.
Awhag ni Fr. Ruiz sa mga kandidato nga ning nagsingabot nga eleksyon ipatigbabaw ang kalinaw aron makab-ot ang “honest, orderly and peaceful elections.” Human sa misa gipapanumpa dayon ang mga mitambong nga mga kandidato nga ilang tumanon ang peace covenant.
Apil sa mga nilagda mao sila ni Rep. Gwendolyn Garcia (Cebu, 3rd district) kinsa mibalik og dagan pagka gobernador, Talisay City Mayor Eduardo Gullas kinsa midagan pagka kongresista sa unang distrito, kanhi congressman Pablo John Garcia kinsa midagan pagka kongresista sa tersero distrito.
Nagtuo si Congresswoman Garcia nga kompleto ang motambong sa peace covenant signing ug ang ilang pagtunga sa kalihukan nagpasabot lang sa ilang pasalig sa ilang giluwatan nga saad.
“Unsaon, partial peace ra. Kay kami, we committed to that pledge but they are not around,” matod sa Garcia.
Sa kampo sa Liberal Party, silang Rep. Wilfredo Caminero (Cebu, 2nd district) ug Gigi Sanchez, kinsa magpapili isip Provincial Board member, ang nakatambong.
Matod ni Caminero, iyang gihatagan og taas nga bili ang peace covenant nga maoy hinungdan nga misanong siya sa imbitasyon sa kapulisan sa probinsya. (AYB)