TUNGOD sa Rice Tariffication Law, aduna’y pipila ka mga kawani sa National Food Authority (NFA) 7 nga mawagtangan og trabaho.
Apan wala pa kini matino kon kinsa ang ibalhin ug ang kon kinsa ang mawagtangan gyud og trabaho.
Nitumaw kini human kasagaran sa responsibilidad sa maong ahensiya adto na sa Department of Agriculture (DA) 7.
Si DA 7 officer-in-charge Regional Director Atty. Salvador Diputado nibutyag sa Superbalita Cebu nga niadtong Miyerkules, Pebrero 9, nakigtagbo si DA Secretary Emmanuel Piñol sa tanang regional diretor sa DA sa nasod aron pagahisgutan ang Republic Act 11203 o ang Rice Tariffication Act nga gipirmahan ni Presidente Rodrigo Duterte niadtong Pebrero 14.
Tungod kay i-marginalize naman ang NFA, ang main function nalang sa maong ahensiya mao ang pag-buffer o pag-stock sa bugas aron andam kini sa panahon sa kalamidad o emergency.
Dugang ni Diputado nga sa maong bag-ong balaod tangtangon ang commercial ug regulatory functions sa NFA.
Si NFA 7 regional director Fernando Nuñez, nibutyag sa Superbalita Cebu nga sundon nila ang maong bag-ong balaod ug naghuwat usab sila sa re-structuring plan gikan sa ulohang buhatan nila.
“A Change Management Team (CMT) has been created at the NFA Central Office for this purpose,” si Nuñez nagkanayon.
Dugang niini nga isip pagprotesta, nagsul- ob ang ilang mga empleyado og itom nga sanina sugod niadtong Lunes isip silent protest diin molungtad kini og siyam ka adlaw.
Ang bag-ong balaod nga Rice Tariffication Law, daw maghatag kini og mas ubos nga presyo sa bugas sa nasod tungod kay unlimited na ang pag-import sa bugas sa nasod.
Mamahimo kining epiktibo sa umaabot Marso 5 sa nasod diin gipanglantawan nga moabot sa P11 Bilyones nga buluhison ang madawat sa gobyerno sa unang
tuig sa pagpatuman sa maong balaod.