Lalake gikan nga mipiyansa gipatay

USA ka 34 anyos nga lalake nga gikan nipiyansa sa iyang kaso sa korte ang gipusil ug namatay dihadiha human nakaangkon og nagkadaiyang samad pinusilan sa lawas.

Ang pagpamusil nahitabo sa Barangay Looc, dakbayan sa Mandaue, alas 3:20 sa hapon sa Miyerkules, Pebrero 20.

Giila ang gipusil nga si Marv John “Marchan” Soco, taga Barangay Looc, dakbayan sa Mandaue.

Matod ni SPO3 Ariel Perez, imbestigador sa Opao police station, nga padung na sa sudlunon nga dapit sa ilang balay si Soco uban sa iyang kapuyo lulan ang motorsiklo sa dihang gipusil kini sa makadaghan.

Ang mga suspek ang giingong lulan usab og motorsiklo nagsul-ob og hood nga gray ug helmet, ang angkas sa motorsiklo ang nipusil.

Samdan usab ang kapuyo niini nga daling gidala sa tambalanan.

Giingon nga gikan nipyansa sila si Soco sa korte sa kaso niini nga paghupot og mga drug paraphernalia sa dihang lakip kini sa nasikop atol sa buy-bust operation niadtong Pebrero 12.

Kaso niini mao ang kalapasan sa R.A. 9165 sa Section 12 kon paghupot og mga drug paraphernalia.

Nasikop kini niadtong Pebrero 12, alas 11:35 sa gabii, atol sa buy-bust operation sa dihang naatlan siya ug laing usa ka kauban sa sulod sa panimay sa subject sa buy-bust.

“Kay naa man siyay kaso sa drugs, initial nato nga gitan-aw nga motibo sa pagpatay, may kalambigitan sa ilegal nga drugas, pero ato pa sad tan-awon ang uban pa nga anggulo,” saysay ni Perez sa Superbalita Cebu.