MOKABAT sa 463 ka mga indibidwal gilangkuban sa 46 ka pamilya ang nagdali-dali sa pagpamakwit human gikareport nga adunay presensya sa armado sa Barangay Tagpangi ning siyudad sa Cagayan de Oro.
Nahidangat sakay sa ilang barangay vehicle, mga motorsiklo, truck ug uban pang sakyanan ang maong mga pamilya aron magpasilong usa sa Barangay Lumbia human sa giingong presensya sa armado.
Sa interbyu sa SunStar SuperBalita kang 403rd Brigade sa 4th Infantry Division (4ID) Philippine Army Colonel Edgardo De Leon, gibutyag niini nga aduna na silay giimbestigahan nga nagpakatap niini ug giimbestigahan na karon sa kapolisan.
“Nalaman na yong source at nakita natin na walang malicious intent. Nagkataon lang na hindi niya na validate ang sitwasyon nag create ng panic,” pasabot ni De Leon.
Dugang pasabot niini nga tungod usab kay walay signal sa maong lugar hinungdan nga wala dayon silay igong komunikasyon ug hatod-hatod og estorya lamang ang nahitabo nga miresulta sa pagpamakwit.
Tungod sab kay walay kamatouran niini nga report, gipabalik sa ilang tagsa-tagsa ka puloy-anan ang mga bakwit nga gihatod ra sab sa mga sakyanan nga gipadala sa local nga kagamhanan sa Cagayan de Oro.
Ang City Social Welfare Development (CSWD) naghatag sab og snack ngadto sa mga biktima ug mga alas 1:00 sa kadlawon nakabalik na tanan sa ilang tagsa tagsa ka puloy-anan.
Nagsugod ang taho
Gibutyag nga nagsugod ang taho dihang dunay nakakita nga tawo nga nagbitbit og flashlight gamit ang lighter sa usa ka balay nga kanunay walay tawo.
Ang maong insidente gitaho niini sa iyang pamilya ug niabot sa mga silingan, hinungdan sa pagpamakwit. Apan nasayran nga ang nakakita niini dili ang una nga nibakwit.
Matud ni Police Senior Inspector Jerson Estanilla, hepe sa Police Station (PS8) Lumbia, sa pakighinabi sa SunStar Superbalita, nga wala gyud silay na-estorya sa maong dapit nga giingong nakakita sa armadong grupo.
"Wala gyud ta'y ma estorya didto nga nakakita siya'g armado pulos lang sila moingon nga nagbakwit lage mi sir kay nagbakwit among silingan," matud ni Estanilla.
Galabay-labay
Si Ka Malin Mabini, kinsa tigpamaba sa North Central Mindanao Command sa New People’s Army (NPA), aminado nga ang area sa Tagpangi maagi-agian sa ilang grupo.
Apan wala nagpasabot nga dinha sila magdugay ug magpundo.
Kung adunay mga armado sa dapit nga gaagian, posibleng ila kining sakop kay ilang dalan ang dapit.
Giklaro sab niini nga dili nila kinaiya nga manghasi o manghadlok sa mga sibilyan kay nasayod sila sa ilang mga katungod.
Naay gikulata
Gipasabot usab ni De Leon nga mga duha ka adlaw ang nilabay gikan sa hitabo adunay usa ka residente sa dapit nga nagpatabang sa kapolisan kay giingong gikulata sa armado.
Giingong sa pag-angkon ni Ka Malin nga positibo nga mag-agian sila sa area dako ilang pagtuo nga kini sila maoy nangulata sa usa ka residente.
Hinuon, naghulat sila sa imbestigasyon sa kapolisan kalabot sa hitabo.
Tungod niini, nanawagan sa katawhan ang awtoridad nga dili mag-panic ug mangutana kon tinuod ba nga dunay presensya sa mga datuang tawo.
Gihangyo sab niini nga dili dayon magpost deretso sa social media ang katawhan aron sab dili maghatag og kahadlok sa uban residente.