ANAA sa 20 porsyento sa mga nangaminyo na ang nibalik sa pagtungha human nga laing unom ka mga classroom ang giturn over sa lokal nga kagamhanan sa siyudad niadtong Pebrero 19 sa Sitio Man-ai, Barangay Tignapoloan, Cagayan de Oro.
Matud ni Kapitan Nancy Aban sa Barangay Tignapoloan nga naaghat sa pagtungha og balik ang mga nangaminyo na ug ni-undang sa pag-eskwela ilabi na nga anaa na sa ilang tugkaran ang mga eskwelahan.
“Naa’y mga naminyo na sauna nga nang-ekwela og balik, naa siguro sa 20 porsyento siguro pud ang namalik pud nga mga mama, kay kasagaran man gud sa bukid sayo naminyo kay naa naman sa tugkaran so di napud sila maulaw,” matud ni Aban.
Gidugang pa niini nga dako kining tabang sa mga kabataan ug nahagit usab ang mga kabataan sa ilang dapit nga motungha kumpara kaniadto nga anaa sa 40 ka kilometros ang baklayaon aron lamang nga mo-eskwela sa sentro sa Tignapoloan National High School.
“Na-challenge gyud ang mga bata nga mo eskwela gyud sila kay nakita man nila nga gitagaan gyud pud og value ang education,kay naa naman gyud diri sa ilahang tugkaran, dinhi daghan na ang nang eskwela og balik,” dugang ni Aban.
Giingong anaa sa pito ang mga magtutudlo sa maong tunghaan ug ika-pito ang ulo sa maong eskwelahan.
Matud usab ni Engr. Rolando Pacuribot sa City Engineer’s Office nga nagsugod kaniadto sa tulo lamang ka classroom sa Man-ai National High school diin anaa sa 67 lamang ka mga estudyante apan tungod sa papulasiyon, hinungdan nga gidugangan kini.
“Daghan man mga minyo nga nangabalik sa eskwela so dali kaayo ang pag-double, pag 2015 mao tong gitukod ang ikaduha, again ni-double na sab ang population so mao ni nagdugang na pud,” matud ni Pacuribot.
Samtang nagmapasalamaton usab si Jonathan Dela Peña, school division superintendent, gumikan kay niubos na ang dropout.
"Tungod aning building karon ang atong classroom-pupil ratio gikan sa 1:78 sa 1:30 ideal na kaayo. Tungod pud ana, niubos pud ang atong repetition rate. Karon daw sa 2019, niubos na ang repetition rate ug drop-out rate," matud niini.