UNSA may imong New Year’s Resolution karong 2019, Ma?” ni Ben nga nagmakinilya sa iyang kompyuter kay nakig-chat siya sa iyang Mama Gina. Alas diyes na sa gabii sa Disyembre 31. Nagsugod na ang buto-buto sa palibot sa nagkadaiyang mga pabuto. Hinay ra paminawon niya ang mga buto-buto sa gawas, kay nia man siya sulod sa iyang air-con nga lawak sa balay sa iyang Mama sa sityo Parasito ning dakbayan.
Ulitawo pa si Ben, 35 iyang edad, apan duna nay anak nga nag-edad og usa ka tuig kapin. Ang inahan sa bata, si Dina, taga sityo Tugalha. Tua sa inahan ang bata, pero giila gyud ni Ben nga iya kining anak. Gani, suod na kaayo siya sa bata. Anha niya sa iyang balay pakatulga ang bata tagpila ka adlaw. Way trabaho si Ben apan wa siya maglisod sa kuwarta. Pinadalhan siya og P20,000 kada bulan sa iyang Mama.
‘Single Mom’ ang iyang Mama Gina,ug siya (Ben) bugtong anak niini. Bayinte na ka tuig nga ang iyang Mama nagtrabaho isip ‘domestic helper’ sa Amerika. Mouli siya sa Pilipinas kausa sa tulo ka tuig. Ug karong 2019 tingpauli niya sa Pilipinas.Nagsalig si Ben nga pinangga kaayo siya sa iyang inahan. Pinatuyangan siya sa gusto. Bisag unsay pangayuon ihatag kini sa iyang inahan. Bisan pa sa kaabunda sa kuwarta (P3,000 ang semana niyang alawans sa nagtungha pa siya sa kolehiyo) wa gyud kahuman og kurso si Ben. Hurot ang kuwarta sa ‘shabu’ uban sa iyang mga barkada.
Sa miaging Disyembre, dili lang kay P20,000 ra ang gipadala sa iyang Mama, kundi P80,000 gawas sa binulang alawans. Kanunay lang hulgaon niya ang iyang inahan nga maghikog siya (Ben) kon di kini mopadala og subrang kuwarta. Sa unang seman sa Disyembre nangayo si Ben og P20,000 kay kunohay nag-away silang Dina ug ilayas niya si Marlene, ang ilang anak. Dad-on niya kini sa Bacolod sa balay sa iyang amahan nga miila na kaniya (Ben) nga anak. Gipadad-an gyud ni Gina. Pag-abot sa kuwarta gi-shopping dayon nilang Ben ug Dina. Drama lang diay ang ilang away-away aron lang makapangayog kuwarta. Unya kalit lang nagkalibanga ang bata. Na-admit sa ospital. P40,000 na sab ang gipangayo ni Ben sa iyang Mama aron makagawas ang bata sa ospital.
GIBASA ni Ben ang tubag sa iyang Mama Gina sa iyang pangutana ganiha bahin sa New year’s resolution. “Mao ni akong New Year’s resolution, Dong Ben. Sukad kaaron dili na ko mopadala nimo og kuwarta nga subra sa P20,000 kada bulan. Pangita nag trabaho. Ayaw na pagsalig nako. 35 na baya imong edad. Di ka maulaw? Gipul-an na kog padako sa imong bukog. Ug karon, hasta sa bunga sa imong uwag! Wa ko kauyon sa imong gipaangkan. Salin na siya sa daghang lalake. Duna koy ‘eyes and ears’ diha sa ato, mao nga nasayod ko sa inyong modus ni Dina. Inyo kong gihimong gatasan. Sa sunod tuig P10,000 na lay akong ipadala nimo kada buwan. Busa pagsugod nag barog sa imong kaugalingon Sugod karon. Nagtuo kang nahadlok ko sa imong hulga nga maghikog? New year’s resolution gihapon nako nga dili na ko mahadlok sa imong hulga. Ikaw maoy tag-iya sa imong kinabuhi kay hinatag na sa Diyos kanimo. Kon kutluon nimo ang imong kinabuhi, imo ra nang hukom. Duna kay ‘free will’. Dili ko mabasol nimo kon magpakamatay ka. Ikaw ray nagpili sa imong hukom. Ikaw ray nagpili sa imong bisyo! Kon maghikog ka, igo na lang ko magpahipos sa imong lawas!”
Naniga ang mga mata ni Ben. Nangluspad. Gipaningot. Dako ang iyang pagbasol nganong nangutana pa sa iyang Mama. “Aaaarrrrgggghhh!” hapit mosinggit siya sa iyang kalagot. Gialsa niya ang ‘monitor’ sa kompyuter. Iya untang ibundak. Apan gianugdan siya kay puwede pa kini mabaligya. Hurot-hurot na niyag pamaligya ang mga butang sa balay sa iyang Mama. Ang kompyuter ray nahibilin ky maggamit man sa internet. (KATAPUSAN)