NIADTO pa diay’ng miaging semana nipatim-aw sa kapulisan si Nel Spencer Tiu, ang uyab sa 19-anyos nga si Ashley Abad, kinsa gikatahong namatay gumikan sa overdose sa party drug nga Ecstasy. Kini maoy gibutyag ni PRO 7 chief Debold Sinas. Pero ambot og nganong karon pa man pa man kini gibutyag sa kapulisan ang maong kalambuan. Matod si Sinas nga niatubang na si Tiu ni Cebu City Police Office (CCPO) Director Royina Garma niadtong Pebrero 13.
Morag dungan pod ni niadtong paggawas sa balita nga gikuha sa banay’ng Tiu isip abogado si Orlando Salatandre. Nganong wala may media coverage nga nahitabo sa pag-atubang ni Tiu sa kapulisan? Gumikan kay maoy hangyo sa mga ginikanan? Kay adunahan? Apan kon pobre pa ni, presentar dayon ngadto sa media? Ug sama sa gilauman, nanghimakak si Tiu nga siya maoy naghatag og party drug ngadto ni Ashley.
Aw, tanang tawo aduna man gyuy rason ba. Kon dili siya, si kinsa man ang “drug dealer o pusher” niadtong higayona? Usa kaha sa ilang mga barkada?
Wala makakita o walay kalibutan si Tiu nga gitunulan na diay si Ashley og party drug sa ilang kauban? O mitumar lang og iyaha si Ashley nga wala magpahibalo kang Tiu? Kon nakakita si Tiu sa tawo nga mihatag og party drug ni Ashley, unsa man ang iyang gihimo? Iyang gisita o konpronta ang maong tawo? Iya bang giingnan si Ashley nga ayaw og tumar ana? O mikonsente siya? O ba kaha mitumar pod siya og iya aron pod ma-high?
Human nakuyapi si Ashley, unsay iyang gihimo? Apil ba siya sa midala niini sa tambalaman? Didto ba siya sa kiliran ni Ashley sa dihang nag-comatose kini hangtod nga namatay sa pagka-ugma? Kini maoy mga pangutana og misteryo nga naglimen sa kamatayon ni Ashley nga angayan tubagon aning Tiu. Dili lang moderetso siya og panghimakak nga dili siya naoy naghatag og party drug ni Ashley. Unya nganong usa ka buwan pa man siyang mipatim-aw human mamatay ang iyang hinigugma? Didto siya sa paglubong? Unsang klase ning pagka-hinigugma si Tiu, di man mounong. (bobbygnalzaro@gmail.com)