DI LANG kay gipangsuspenso kon dili gipangtaktak gyud diay sa ilang trabaho kadtong tulo ka mga nurse sa Tuburan District Hospital nga mikuha og video footage sa usa ka suspetsadong drug personality nga nalandig sa tambalanan human kini mapusili sa mga tinugyanan sa balaod.
Ang suspek nga si Gembe Casas naglimbaglimbag sa kasakit sa dihang nahilandig kini sa maong tambalanan tungod sa samad pinusilan, apan imbis akatahon og maayo, gikuhaan hinuon kinig video ug gi-uplaod sa social media.
Pipila ka gutlo ang milabay nahunosan sa iyang kinabuhi si Casas, ug ang video nga gi-upload nag-viral.
Sa imbestigasyon sa Provincial Health Office (PHO), nasuta nga ang tulo nakalapas sa Republic Act No. 10173 kon Data Privacy Act.
Dili ta mokwestiyon sa pagtaktak sa tulo ka mga nurse nga pulos job order employees kay duna man gyud silay violations nga nahimo, pero hinaot nga dili lang unta kutob o kontento na lang sila niini.
Palawman ang imbestigasyon aron pagtino kon tinuod ba nga miumento na ang serbisyo niini. Diha bay doctor sa dihang gisulod sa emergency room si Casas?
Pipila man ka gutlo o oras nga nakaatiman siya ni Casas gikan sa paghidangat niini sa tambalanan? Diha bay tambal nga nadapat o sakto ba sa kahinaman?
Dili kini maoy unang higayon nga gireklamo ug nakontrobersiya ang TDH. Nahinumdom mo sa usa ka 39-anyos nga public teacher nga si Hazel Reval kinsa gidala sa maong tambalanan kay misaka ang sugar level.
Matod pa sa taho nga alas 7 sa buntag diha na ang maestra apan giadmit kini alas 2 sa hapon. Giresitahan sa doctor og insulin alas 7 na sa gabii.
Human ma-indiyeksiyoni, gidala gilayon sa hospital sa dakbayan sa Sugbo apan didto nahunosan sa kinabuhi. Kining ingon aning serbisyo maoy angay usab nga korehian.