GIPASALIG ni Cebu-based Nigerian mixed martial artist Simeon Uchenna nga maangkon niya ang iyang ikaduhang sunodsunod nga kadaugan sa iyang tahas sa ‘MMA Super Fights’ fight card karong Sabado sa MCM Dapitan City Cultural Center.
Si Uchenna, kinsa sakop sa Yaw-Yan ArDigma Cebu ni Master Benigno ‘Ekin’ Caniga Jr., nakatakdang makigbatok kang Ivan Lugatiman sa Equilibrium MMA sa Cagayan De Oro City sa main event sa promosyon.
Nagkanayon si Uchenna nga tinguha niyang makahatag og dungog sa Sugbo nga iyang giisip nga ikaduha niyang panimalay hinungdan nga grabe ang iyang paningkamot sa training.
Asoy niya nga iyang gihangop ang Yaw-Yan Ardigma Cebu nga iyang pamilya ug gitrato niya si Master Ekin sama sa usa ka amahan.
Sa premiro niyang away sa amateur MMA niadtong Agusto 22, 2017, gisurpresa ni Uchenna ang mas taas og kasinatian nga si Rodel Valisado pinaagi sa split decision.
Si Master Ekin mipadayag sa iyang dakong pagsalig kang Uchenna.
Gawas kang Uchenna, malaumon sab si Master Ekin sa poruhan sa laing sumosulbong niyang fighter nga si Allan Albindo, kinsa wala pa’y pilde sulod sa lima ka mga away.
Si Albindo makig-away kang Johnrel Dionson sa D’Power MMA of Dipolog sa undercard.
"Dako ko'g pagsalig nga modaog na sab si Albindo aning awaya," nagkanayon si Master Ekin. (ESL)