SAGUBANGON na sa Team Pilipinas karong alas 12:00 sa tungang gabii (RP time) ang usa sa duha nila ka mahinungdanon nga nahabiling mga tahas batok sa host Qatar squad sa 6th window sa FIBA World Cup Asian qualifiers.
Ang Team Pilipinas, nga adunay 5-5 nga rekord sa Group F, nagkinahanglang modaog ning sangkaa aron magpabiling buhi ang ilang paglaom nga maka-qualify sa 2019 FIBA Basketball World Cup nga ipahigayon karong Agusto 31 hangtod Septiyembre 15 sa China.
Bisan kuwang man tuod og preparasyon ang Team Pilipinas apan national coach Yeng Guiao nipadayag sa iyang dakong pagsalig nga molampos ning maong tahas.
Gipasabot ni Guiao nga ang determinasyon nga gipakita ni naturalized player Andray Blatche nakahatag og kadasig sa tibuok niyang puwersa.
Gawas kang Blatche, ang ubang mga sakop sa Team Pilipinas mao sila si Japeth Aguilar, Mark Barroca, Jayson Castro, Poy Erram, June Mar Fajardo, Marcio Lassiter, Paul Lee, Gabe Norwood, Troy Rosario, Scottie Thompson ug Gilas cadet Thirdy Ravena.
Nanghinaot ang Team Pilipinas nga magpanon ang mga Pinoy nga naa sa Qatar aron mosuporta kanila.
Sa laing bahin, ang mga kadagkuan sa Philippine Basketball Association (PBA) nga gipangulohan nila ni commissioner Willie Marcial ug board chair Ricky Vargas personal nga moabiba sa Team Pilipinas.
Naa sab ang mga sakop sa PBA Board aron paghatag og dugang kadasig sa Pinoyng mga basketbolista.
Human ning maong tahas, ang Team Pilipinas moasdang na sab sa Kazakhstan karong Pebrero 24 sa katapusan nilang misyon sa qualifiers. (ESL)