Tambong mo sa covenant signing: Radaza

GI-AWHAG ni Lapu-Lapu City Mayor Paz Radaza ang iyang mga kauban sa partidong Team Deretso Lakas-CMD sa pagsalmot sa peace covenant signing sa dakbayan sa Biyernes, Pebrero 22.

Kini pamahayag sa mayor dihang gipangutana sa Superbalita Cebu kon andam ba siya mosalmot sa kalihukan nga gipasiugdahan sa Lapu-Lapu City Police Office ug Commission on Elections (Comelec) .

Gibutyag hinuon sa mayor nga wa pa siya makadawat og imbitasyon sa naasoyng kalihukan hangtod kagahapon, Pebrero 20, duha ka adlaw sa dili pa ang nahisgotang kalihukan.

Kon pormal na kini niyang madawat, iya dayon pakigkitaan ang iyang mga ka partido aron hisgotan ang ilang pagtambong.

Gihulagway sa mayor nga makaayo ang maong kalihukan aron mapakita sa katawhan nga silang mga kandidato uyon sa hapsay ug malinawon nga piniliay.

Gani, gawas nga nasurprisa siya kaniadto sa pagpaubos sa Orange Status sa dakbayan sa mga Election Watchlist Areas (EWAS), way nakitang problema ang mayor kalabot niini sa pagkakaron.

Alang kaniya nakaayo ra usab ang kanunay nga pagbantay sa kapulisan sa mga kandidato sa dakbayan.

“Ang ako lang nga with such kuan sa Comelec, mura raman pud na og giingon nga gibantayan lang gud og maayo which sa akong kaugalingon murag okey raman kay maayo hinuon na dili kaayo ta kakiat, in a positive way nga imong tan-awon mas peaceful na hinuon kay tutok man kaayo sila (ang kapulisan)” matod ni Radaza.

Si Pajo Brgy Kapitan Junard “Ahong” Chan sa Team Libre sa Partido Demokratiko Pilipino-Lakas ng Bayan PDP-Laban, kinsa nidagan pagkamayor kontra ni Kanhi mayor Arturo “Boy” Radaza, bana ni Mayor Paz, nanghinaot nga unta seyosohon sa mga kandidato ang peace covenant signing ug di lang kutob sa papel o manifesto.

Matod ni Chan nga siya mismo makapangutana kun seryosohon ang maong kalihukan sa mga kandidato.

Sama sa mga Radaza, wa pa usab siya kadawat sa imbitasyon sa kalihukan, apan nipasalig nga iyang pakigkitaan usab ang iyang mga ka-partido sa higayon nga makadawat sa imbitasyon.

“Peace covenant lang ang ngan pero ang kandidato mismo wa gyuy pagtubag sa iyang gipirmahan, karon gani akoang mga tawo harasson nisumbong nako mao nga ako sa saboton ang grupo ug unsay unod anang peace covenant tan-awon nato,” matod ni Chan sa pangutana kon moapil ba sila sa nahisgotang kalihukan. (GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph