WALA nakita sa kagamhanan sa dakbayan sa Lapu-Lapu ang panginahanglanon sa pagdeklarar og dengue outbreak sa dakbayan.
Kini bisan pa man kun dako gayud ang pagsaka sa mga kaso sa sakit nga dengue sa dakbayan sa unang duha ka buwan sa tuig 2019 diin moabot na sa 361 ka mga kaso ang natala, usa niini ang namatay.
Matod ni Lapu-Lapu City Mayor Paz Radaza nga bisan kung tinuod nga taas ang pagsaka sa kaso sa dengue sa dakbayan sa unang duha ka buwan karong tuiga, apan kontrolado kini sa city health officials sa pagkakaron.
Pagpasabot sa Mayor nga gihingusgan na sa dakbayan ang ilang kampanya batok sa dengue sama sa subsub nga pagpanglimpyo sa mga nagkadaiyang mga Brgy Health Workers BHW sa dakbayan hilabi na niadtong mga barangay nga taas ang kaso sama sa mga Barangay Basak, Babag, Pusok, Gun-ob, Mactan ug Marigondon.
Ang pagkahugaw sa mga tugkaran maoy usa sa gitumbok nga rason sa pagpundo sa mga lamok nga nagdala ug sakit nga dengue.
Numero unong gitagaan ug prayoridad sa mga health wrokers nga malimpyohan mao gayud ang mga lugar nga sagad pundohan sa mga lamok ug gamitan ug mga chemical alang sa “misting” aron masigurong mapatay ang mga lamok nga sagad nagpundo sa hugaw nga mga lugar.
Gawas niini, nagpadayon karon ang ilang information dissemination sa kabarangayan mahitungod sa dengue ug sa ka importante nga modangop dayon sa mga health center kun ugaling adunay pamation sa lawas ug dili na mohuwat nga magrabehan sa naasoyng sakit.
Sa Barangay Bangkal giingong isyuhan og citation ticket sa mga opisyal sa barangay ang mga panimay nga masakpang hugaw ang palibot aron masiguro nga ang tanang molopyo manglimpyo gayud sa ilang tugkaran.
“Dili man gyud hinuon ingon nga nabalaka ta nuh pero ato man gud dayon gi-aksyonan man pud we go around atong gitan-aw pareho rasad pud gud ni sa ato peace and order nga kanunay gyud na nato ginatan-aw kay once nga dunay mga dako na nga problema maglisod baya ta ug kontrolar,” matod ni Radaza.
Wala mabalaka ang mayor sa posibleng epekto niining pagsaka sa dengue sa turismo human wala siyay nadawat nga taho gikan sa mga resort nga nihinay ang ilang mga “guest” gumikan sa kahadlok sa sakit nga dengue. (GCM)