ANG Multi-Tripartite Monitoring (MTM) board gikatakdang magtagbo sunod semana para masugdan na ang rehabilitasyon sa Inayawan Landfill sa dakbayan sa Sugbo.
Matod ni Nida Cabrera, pangulo sa Cebu City Environment and Natural Resources, gisugdan na og limpyo ang agianan sa duga sa basura aron dili kini makalahos ngadto sa lecheate pond.
Adunay di mominos P135 milyones nga gigahin ang City Government isip inisyal nga pundo para sa rehabilitasyon sa landfill. Kini maoy girekomendar sa Court of Appeals ug gipalig-on sa Korte Suprema gumikan sa pagdangop ngadto sa korte ni Konsehal Joel Garganera kinsa maoy nakakuha sa Writ of Kalikasan.
Si Cabrera niingon nga bisan adunay legal isyu ang 15 ektaryas nga kanhi landfill sanglit giangkon kini og pribado nga tawo, ipadayon gihapon sa siyudad ang rehab sanglit ila kining pasalig.
Ang MTM nga gipangulohan sa Environmental Management Bureau maoy lead agency sa pag-rehab sa landfill aron mapahimuslan pa ang 15 ektaryas nga luna sa Inayawan human kini gigamit sa City Government sulod sa duha ka dekada.
Matod ni Cabrera nga unahon og trabaho ang drainage sa aron adunay kaagian ang mga duga sa basura ug dili mobuhagay sa bisan asang dapita sa kanhi landfill sanglit kini delikado.
Sa dili madugay, mobalik na usab unya og trabaho ang contractor sa pagkoral sa kanhi landfill sanglit hapit na mahuman ang pag-usab sa desinsyo sa koral base sa rekomendasyon sa consultant.
Ang methane gas gikan sa basura posibleng moapekto sa mga kasikbit nga balay, si Cabrera niingon nga aduna silay sistema nga ipatuman aron masiguro nga luwas gikan sa peligro ang gatusan ka mga residente nga anaa nagpuyo duol sa landfill. (PAC)