HUMAN giingong duna pay contact sa iyang mga tawo sa gawas sa Cebu Provincial Detention and Rehabilitation Center (CPDRC), gi-isolate na usab sa laing selda ang giingong drug lord nga si Alvaro “Barok” Alvaro sugod niadtong Miyerkules, Pebrero 20.
Si Atty. William Boco, legal officer sa CPDRC, nibutyag nga pinaagi sa paglahi og selda ni Barok, mas dali ma-monitor ug ma-control ang giingong mga lihok niini sa gidili nga drugas.
“Ma-minimize ang iyang movement kay di man siya kagawas, maglisod siya og communicate outside, hatdan gihapon hinuon siya og pagkaon,” siya namahayag.
Matod niya, kauban ni Barok sa selda si Jimmy Largo, ang suspek sa pagpatay ni Ermita Barangay Kapitan Felicisimo “Imok” Rupinta niadtong 2017.
Ilang nahibaw-an nga si Barok sa dihang wala pa ma-isolate, wa magkatulganan sa selda 1 nga maoy iyang opisyal nga selda, ug adto kini maghigdaan sa selda 111, diin ana ang iyang mga higala.
Ang kapulisan sa dakbayan sa Danao nakasakmit og di mominos P2.5 milyones nga balor sa illegal drugs ug 12 ka mga indibidwal ang nasikop sa gipahigayon nga managlahing mga operasyon sa unom ka mga barangay sa siyudad.
Si Supt. Maribel Getigan, hepe sa Danao Police Station, nibutyag ang mga nangadakpan kay mga gagmay nga tigbaligya og shabu ug giingong gikan sa ilang contact sa CPDRC nga gidudahan nga si Barok.
Apan giklaro ni Boco dili gikan sud sa provincial jail ang supply sa shabu kay dugay na kini nilang nahabwa.
“We’re almost 100 percent, 99.9 percent nga wa na gyuy shabu. Kay in fact nahabwa man ang shabu didto sa sulod, that was September,” pagtataw niini dihang nahinabi sa Superbalita Cebu pagka Miyerkues, Pebrero 20.
Sigon niya, bisan gani ang mga cellphone ug mga accessory sa paggamit niini ang napugngan usab nila nga makasud.
“We’re confident nga wala nay bag-ong cellphone nga nakasulod, ang ako ana, katong naa sa sud maoy gihinayhinay og habwa,” paneguro ni Boco.
Katulo na sila nagpahigayon og greyhound operation sa CPDRC karong tuiga, niadtong Enero 31, Pebrero 7 ug Pebrero 20. Sa uwahing operasyon sa unom ka mga selda, apil ang selda ni Barok, sim card, duha ka cellphones, charger, battery ug screwdriver lang ang nakuha.
Ang mga selda nga gisiksik sa mga tinugyanan sa CPDRC mao ang 2, 3, 110, 112 ug ang 1 nga maoy opisyal nga selda ni Barok ug 111 diin kini naghigdaan sa una.
Sa kasamtangan, adunay 3,320 ang mga piniriso sa CPDRC diin 3,074 mga lalake samtang 246 mga babaye. Ang pasilidad gidumala sa kagamhanan sa lalawigan. (SCG)