GIPAUBOS sa kinalit nga greyhound operation ang Medellin District Jail sa sitio Lutsa, Barangay Caputatan Sur sa mga sakop sa Bureau of Jail Management and Penology (BJMP) nga inabagan sa Cebu Provincial Police Office Miyerkules sa buntag, Pebrero 20.
Nagsugod sa pagsiksik ang mga sakop sa BJMP-Medellin, kapulisan ug Philippine Drug Enforcement Agency 7 alas 6 hangtod sa alas 9:30 sa buntag ang mga silda sa mga lalake ug babaye.
Lakip sa ilang gisusi ang lawak ni kanhi Medellin Mayor Ricardo Ramirez sa Bogo Medellin Medical Center diin siya gi hospital arrest sud na sa kapin usa ka tuig.
Nakakuha silag mga kontrabando sa lawak ni Ramirez sama sa mga binotelya nga ilimnong makahubog nga imported, kinaha nga sigarilyo, lighters, nagkadaiyang cellular phones, wireless charger, playing cards kun baraha ug portable speaker.
Ang maong mga kontrabando hugot nga gidili sanglit usa ka tambalanan ang kasamtangan nga gibutangan ni Ramirez.
Gipaubos dayon sa drug test ang kanhi mayor sa PDEA human makadawat og report nga padayon gihapon kini nga mogamit sa illegal nga drugas, apan nag negatibo kini.
Tungod niini, ang jail warden sa Medellin District Jail nga si Jail Supt. Corazon Noel moimbestigar sa mga jail officer nga nagbantay kang Ramirez sa tambalanan.
Usa sa mga sutaon nganong nakasulod ang mga ilimnong makahubog ug sigarilyo nga unta masakiton man kini.
“Ato man na gi verify unsa nga dutihan, unsa orasa. So, estritko nato nga gi-implement sa mga rules and regulations, atung tan-awon nganong nakasulod na diha,” matod ni Noel.
Ipasusi na usab nila ang kahimtang sa panglawas sa kanhi mayor kon angay na ba kining ibalhog sa selda sa Medellin District Jail kon wa na kini sakit. (AYB)