GIHULGA nga patyon ang kanhi mayor sa lungsod sa Pinamungajan nga karon magpapili pagka kongresista sa ikatulong distrito sa lalawigan sa Sugbo kondili kini mosibog sa iyang kandidatura sa piniliay sa Mayo .
Si Geraldine Yapha, gipadad-an og duha ka mga bala, usa alang niya ug usa sa iyang drayber nga giputos og suwat nga nag-awhag niya nga mosibog kay kondili patyon silang duha.
Siya nibisita sa Cebu Provincial Police Office (CPPO) pagka Miyerkules, Pebrero 20, aron personal nga magpa-blotter sa iyang nadawat nga pagpanghulga.
Alas 7:30 sa buntag sa Pebrero 20, samtang nanglimpyo ang iyang driver nga si Rex Zamora sa luyo sa ilang pickup sa gawas sa ilang balay sa Barangay Labangon, siyudad sa Sugbo, duna kini nakit-an nga papel nga giputos sa duha ka mga bala sa kalibre 9mm.
“W-draw or die, 2 bullets 1 for you 1 for driver,” ang unod sa suwat.
Gikuhaan una og impormasyon sa kapulisan si Yapha alang sa ilang record apan giabisohan kini nga ipa-blotter usab kini sa Cebu City Police Office (CCPO) sanglit nahitabo kini sa ilang balay sa Labangon nga sakop sa hurisdiksyon sa kapulisan sa siyudad sa Sugbo.
Matod sa kanhi mayor, una kining higayon nga nakadawat siya og susamang hulga sukad siya nisulod sa pulitika sud na sa 20 ka tuig nga nakapabalaka sa iyang siguridad ilabi na karon nga init ang dagan sa pulitika sa iyang gidaganan nga distrito.
Nagtuo si Yapha nga adunay kalabutan sa pulitika ang maong pagpanghulga bisan pa man nga wala pa siyay gihuptan nga ebidensya kinsa sa duha niya ka kaatbang nga modagan usab sa pagka kongresista.
“Well, kon moingon nga pagduda, it’s all speculations kay wala man gyud tay ma-pinpoint kon kinsa. Pero kon maghisgot ta sa akoang kaatbang, siyempre tulo man mi ka buok, so, di ko moingon nga naay usa nila kay wala man gyud tay ebidensya niana. Ang ako lang nga I would made to believe na it has something (to do) with politics,” pahayag ni Yapha.
Adunay usa ka politiko nga wala nganli ni Yapha nga dugay na matod pa nihangyo niya nga paatrason sa iyang kandidatura ug nibungat kinig presyo nga ang labing dako miabot na sa P50 milyones.
Andam niya itug-an ang pangalan sa maong tawo nga nihangyo kaniya sa pag-atras ngadto sa mga pulis apan, iyang giklaro nga wala niya kini gitumbok nga maoy naghulga niya karon.
“Dugay na gyud na siya sigeg hangyo nga pa withrawhon ko. In fact, naay mga personalities nga iyang gipangsugo nga pa withdrawhon jud ko ba. I am not also saying nga siya kay pwede man sakyansakyan no kay its very possible man nga bisan kinsa nalang ang mosakay sa issues kay pulitika man ron” dugang ni Yapha.
Sa iyang pagsugod na sa pagsuroy sa kabarangayan nga sakop sa ikatulong distrito sa lalawigan sa Sugbo wala matod pa siyay gidaot nga iyang kaatbang sa eleksyon.
Usa sa iyang kaatbang sa pagka kongresista, si kanhi 3rd District Cong. Pablo John Garcia niingon nga angay seryusohon ang nadawat nga hulga ni Yapha.
“Any threat, whether confirmed or not, should be taken seriously. The police should provide her protection and immediately investigate if the threat is genuine,” sumala ni Garcia sa text message sa Superbalita Cebu.
Alang kang Toledo City Mayor John Henry Osmeña, kinsa kaatbang usab nila ni Garcia ug Yapha, usa ka “fake news” ang maong hulga.
“Fake news! Ridiculous! She is desperate in getting attention!” pahayag sa mayor.
Si Sr. Supt. Manuel Abrugena, hepe sa CPPO, nitug-an sa text message nga ila una nga tukion ang nadawat nga hulga ni Yapha sa iyang opisina.
Mahimo usab nga mo-apply si Yapha alang sa iyang security pinasubay sa lagda sa Philippine National Police (PNP) ug sa Commission on Election 7.
Hugot usab ang ilang pag-monitor sa iyang mga kalihukan ug mohatag sa seguridad.
“Miss Yapha can apply for security escorts following the procedures set by higher office and the Comelec, we will be closely monitoring her activities and shall provide appropriate security coverage according to the set of rules provided by the PNP,” matod ni Abrugena.
Sa pagkakaron walay bodyguard si Yapha sa iyang mga lakaw apan kon adunay ihatag ang PNP kaniya iya kining hangpon sanglit ang Comelec man ang adunay gahum nga motugot kanila nga hatagan og escort gikan sa kapulisan.
Awhag niya sa iyang kaatbang nga magtinarong lang sa ilang pagpangampanya ug ang katawhan na ang pabut-on kinsa ang ilang pillion atol sa eleksyon. (Sheila C. Gravinez)