DAGKONG premyong salapi ang magpaabot sa mananaug sa ilusad 11th Kidapawan Open Chess Tournament nga gitakda sa Sabado ug Dominggo, Pebrero 24 ug 25, didto sa Kidapawan Convention Center.
Kahinumdoman nga si Daniel Quizon sa DasmariƱas, Cavite, kinsa niadtong tungura 13 anyos pa, nisungkiti sa kampeyonato pinaagi sa pag-angkon og otso puntos sa nine-round Swiss System format nga kompetisyon.
Iyang gipukan sa torneyo sila si top two seeds international masters (IM) Oliver Dimakiling sa Davao City ug Ronald Dableo apan si grand master (GM) Darwin Laylo nitapos sa iyang sunod-sunod nga daug sa ikapito nga hugna.
Ang kampeyon sa maong torneyo mobulsa og P25,000 samtang ang runner-up mouli nga dunay P20,000. Ang duha modawat sab og tropeyo.
Ang ikatulo ug ikaupat nga puwesto moangkon og P15,000 ug P10,000 uban sa medalya.
Ang ikalima hangtud ika-10 nga magduduwa modala sab pag-uli og ganting salapi apil na ang best junior under-20, best female ug best kiddie under-12.
Ang bayad sa rehistrasyon kantidad og P150 alang sa mga magduduwa sa Kidapawan City ug P300 alang sa di taga Kidapawan.
Ang format karong tuiga mao ang eight-round Swiss Ssytem uban sa time control nga 25 minutos plus five seconds.
Ang torneyo gipasiugdahan sa Kidapawan Chess Club, Incorporated. (MLSA)