DEAR Noy Tikyo,
Tawga lang ko og Jenny, 26 anyos. Magpatambag ko nimo bahin sa akong kahimtang.
Duna koy boyfriend nga 25 anyos sud sa tulo ka bulan apan tinago-tago tungod kay supak ang akong ginikanan.
Apan miabot ang panahon nga nasayran ang among panaghigugmaay. Nakigbuwag ko niya aron nga wa na lay samok.
Human ang usa ka bulan namong pagbuwag, diha pa nako masayri nga mabdos diay ko.
Grabe ang akong pagmahay karon tungod niining akong kahimtang. Kay sa dihang akong giingnan ang akong uyab nga buntis ko, di man siya moangkon niini.
Mauwaw na ko sa mga tawo kay grabe ang tsismis sa among lugar bahin nako.
Nakahunahuna na lang ko og dautan aron nga matapos na ang tanan nakong kasakit.
Mora og di na nako kaya ang akong problema. Palihug tabangi ko.
Jenny
*****
Jenny,
Ayaw na mahaya ang imong kaugalingon kon nganong naingon ka niini karon. Naa na man na, di mo na man mabalik ang kagahapon, busa dawata na lang ang nahitabo nimo.
Wa ka na may mahimo niini ug mas mosamot pa unya ang sitwasiyon kon kanunay mong basulon ang imong kaugalingon.
Ingon man gyud niini ang kinabuhi, mosipyat ta kay tawo ra man ta. Di man ta perpekto. There are times nga mosukamod ta. Apan kinahanglan nga mobangon kita aron nga mopadayon sa atong kinabuhi.
Makatabang nimo ang imong ginikanan karong panahona. Kon wala pa sila masayud sa imong gidangatan, tug-ani sila.
Tinuod, seguradong mosangko kini sa ilang kasuko kanimo. Apan timan-i nga ginikanan sila ug di sila makatan-aw nimo nga maingon niini. Hinay-hinay mawagtang ra ang ilang kasuko ug dawaton ka nila.
Ayaw na og hunahuna og dautan kay mosamot pa unya ang imong suliran. Ipakatawo ang bata ug atimana kini bisan og wala ang iyang amahan.
Ug labaw sa tanan, ayaw og kalimot sa Ginoo. Pag-ampo aron nga imong malabangan kining tanan nga pagsulay nga imong naagian karon.
Noy Tikyo