NINDOT nga magsuroy-suroy o mobakasyon sa mga nindot sab nga mga lugar nga halayo sa kagahob ug polusyon sa siyudad, ilabi na gyud nga nagsingabot na ang summer vacation.
Kasagaran nga suroyan sa mga tawo, kon di man beach, mga resorts nga tua sa kabukiran nga nindot ang palibot tungod kay puno pa sa mga kahoy, presko ang hangin, ug limpyo nga tubig.
Daghan kini nga susama nga lugar bisan og diri lang kita sa Davao Region mosuroy o kaha sa mga kasikbit nga probinsiya, kay gawas nga duol lang, di sab kaayo dako ang gasto.
Malingaw na kita, ilabi na gyud ang atong mga kabataan. Pun-an pa gyud nga dali na lang kita makakuha og mga hulagway tungod sa ka-high tech na sa panahon. Di sama kaniadto nga tua ra gyud sa estudyo makapahulagway.
Daghan nang madala nga handuman ug dali ra sab kining mapaambit sa mga kahigalaan ug mga kaparyentihan.
Apan taliwala ning tanan, angay gihapon kitang mag-amping sa kaugalingon samtang maglingaw ug magpahulagway aron nga malikay kita sa mga katalagman.
Di kita buot nga ang atong lingaw-lingaw ug kalipay, mahimo unyang kasub-anan tungod kay dunay nahitabong disgrasya.
Sama pananglit niadtong lalaki nga nag-selfie ibabaw sa falls didto sa Arakan Valley nga nahulog ug namatay.
Tinuod way magbuot nato kon asa kita mobarog o moporma aron nga makakuha og hulagway, apan kinahanglan nga himuon nato kini sa mga lugar nga di peligro.
Hapit na ang summer ug kasagaran kanato maglingaw-lingaw sa ingon niini nga mga lugar, busa di nato kalimtan nga ampingan ang atong tagsa-tagsa ka kaugalingon sa tanang panahon.