M'LANG, North Cotabato -- Upat ka miyembro sa Moro National Liberation Front (MNLF) nga suspek sa pagpatay sa brigade commander sa Moro Islamic Liberation Front (MILF) nadakpan alas 3 sa hapon niadtong Martes, Pebrero 19.
Giila ang mga suspek nga sila Akmad Abdul, 26; Phonnex Bitol Anog, 42; Nindie Sinumalong Dengkang, 26; ug Tengan Tantong Anog, 52.
Gitudlo ang mga suspek nga maoy mipatay kang Kumander Jun Pananggulon, brigade commander sa 108th Base Command MILF.
Atol sa hitabo, naangol sab ang usa ka Toto Mangulayan sa Sitio Langaban, Barangay Gaunan, M'lang.
Nakuha sa posisyon sa mga nadakpan ang usa ka M1 Carbine rifle, 1- M14 rifle, 1-M16 Armalite rifle, mga bala ug usa ka motorsiklo.
Matud ni M'lang Chief of Police, Supt. Giovanni Ladeo nga nadakpan ang mga suspek sa gilusad nila nga follow-up operation uban ang puwersa sa 7th Infantry, Battalion.
Positibo nga gitudlo sa mga testigo ang upat ka miyembro sa MNLF nga maoy namanhig sa mga biktima gumikan sa dumot sa pamilya sa yuta nga ilang giugmad.
Mga suspek ang gipasakaan na og kaso nga murder, frustrated murder ug illegal possession of firearms. (Edgar E. Fuerzas)