KIDAPAWAN CITY -- Nagsugod na sa pagpangayo og permit to campaign fee o protection money ang New People’s Army (NPA) sa mga lokal nga kandidato sa probinsiya sa North Cotabato.
Kini mismo ang gikompirma ni North Cotabato Police Provincial Office director, Senior Superintendent Maximo Layugan ug ang puwersa sa 901st Brigade, Philippine Army.
Pinaagi sa sulat, text ug tawag gamit ang gadyet ang paagi sa mga NPA sa pagpa-abot sa ilang tuyo ngadto sa mga kandidato.
Mga dapit sa probinsiya nga dunay presensiya sa mga komunistang pundok mao ang Makilala, Magpet, Antipas, President Roxas, Arakan, Tulunan, M'lang, ug Kidapawan City.
Gihulga ang mga kandidato sa mga rebelde nga dili makasulod sa mga hilit nga dapit sa probinsiya kung dili mobayad og permit to campaign fee, diin naghulga pa kini nga kung mamugos posibleng madisgrasiya sila.
Una nang gikompirma ni Philippine National Police Chief Director General Oscar Albayalde sa pagbisita niya sa Regional Police Office 12 Headquarters sa General Santos City nga positibo na nga gipalapdan sa NPA ang pagpangayo og permit to campaign fee sa mga kandidato gumikan nagkahinay na ang gidawat nilang suporta sa katawhan.
Daghan na nga mga barangay opisyal sa Magpet ug Arakan ang mi-alsa batok sa mga NPA sa sobra nilang pagpangayo og revolutionary tax.
Nanawagan si SSupt. Layugan sa mga kandidato nga ipaabot sa ilang buhatan ang ilang pormal nga reklamo aron sila ma-protektahan batok sa mga pagpanghasi sa mga NPA. (Edgar E. Fuerzas)