GIRONDA sa Criminal Investigation and Detection Group (CIDG)-Davap Regional Field Unit (RFU) ang usa ka bodega sa F. Bangoy Street, Agdao, Davao City, Miyerkules sa buntag, Pebrero 20.
Mokabat sa P6.7 milyon ang kantidad sa nasakmit nga mga peke nga sigarilyo.
Sumala sa CIDG-Davao City Field Unit (DCFU), ilang gipatuman ang 42 ka mga search warrants nga gipagula sa korte ning siyudad batok sa usa ka negosyante giila nga si Leo Lee Sy sa Lapu-Lapu Street, Agdao ning dakbayan.
Gidakop sa CIDG-DCFU ang 42-anyos nga negosyante human makuha gikan sa iyang bodega ang mga peke nga 30 ka kahon sa Fortune nga sigarilyo, 24 ka kahon nga Champion cigarette, 23 ka kahon sa More, 36 ka kahon sa Marlboro ug 39 ka kahon sa Mark diin ang tanan nasuta nga mga peke.
Human sa implementasyon sa search warrant, gilayong gidala ang negosyante sa CIDG-DCFU office aron imbestigahan.
Si CIDG-DCFU field unit head Chief Inspector Milgrace Cajes Driz nagbutyag nga nagpositibo ang ilang pagpatuman sa search warrant pinaagi sa ilang makuti nga surveillance.
Giandam na ang kaso nga ipasaka sa negosyante. (Richy F. Nalagon)