NAYABO nga kalan nga dunay daghang kalayo gikan sa gibiyaan nga linung-ag ang posibleng hinungdan sa kalayo nga milamoy sa dul-an 200 ka mga panimalay sa Purok 4, Isla Verde, Barangay 23-C, Poblacion, Davao City, alas 12:30 Miyerkules sa udto, Pebrero 20.
Kini ang gisaysay sa pipila ka mga residente nga silingan ni alyas Dodong, ang balay nga gigikanan sa kalayo.
Sumala ni Esper Juntas, 24, tribong Badjao, nga nayabo ang kalan ni Dodong nga iyang silingan ug pagkataud-taud midako ang aso sanglit gama sa mga light materials balay niini.
Dali sab nga mikanit ang kalayo sa kasikbit nga mga balay sanglit mga payag-payag sa mga Badjao ang nahimutang sa dapit.
Daw impyerno ang sitwasyon sa unang 10-minutos nga paglamoy sa kalayo diin ang mga Badjao nanghakot sa ilang mga gamit, nanakay sa ilang mga bangka padung sa dagat.
Sumala ni Senior Police Officer (SFO) 2 Ramil Gillado, ang deputy chief sa investigation section sa Bureau of Fire Protection (BFP)-Davao, nga naabot sa fourth alarm ang maong sunog sanglit dali kining midako ug kinahanglan daghang mga bombero ang motabang og palong sa kalayo.
Giingon ni Gillado nga walay nakabsan sa kinabuhi sa maong hitabo, apan dunay pipila nga nangasamad human ilang gipangsalbar ang ilang mga gamit.
Dul-an tulo ka oras una pa na-kontrola ang kalayo samtang anaa sa gibana-bana nga P2 milyon ang danyos sa hitabo.
“Mga shanties house ang sagad sa mga gipuy-an diha sa Badjao community, maong dali lang gilamoy sa kalayo. So, far wala may nakabsan sa kinabuhi, except sa pipila ka residente na naa lang ginagmay nga samad sa ilang karatol sa hitabo,” ingon ni Gillado kinsa mipasabot nga nagpadayon pa gihapon ang ilang gihimong imbestigasyon.
Ang mga nasunogan anaa na gipahimutang sa covered court sa Barangay 23-C ug sa Magsaysay Park samtang padayon ang gihimong validation sa City Social Services and Development Office (CSSDO) aron mahatagan og hinabang pinansyal ang mga biktima.
Gilayon usab nga mihatag og serbisyo ang Kusina ng Bayan sa CSSDO nga mihatag og pagkaon ingon man ang pagdunol sa mga social workers og mga habol, banig, ug uban pang gamit sa pagluto.
Kahinumdoman, April 4, 2014 mokabat 8-ektarya ang gilamoy sa kalayo sa sama gihapon nga dapit. (RFN/JPC)