NASAKMIT gikan sa usa ka batan-on ang 850 gramos nga shabu nga mobalor og P5,780,000 atol sa buy bust operation sa Barangay Sawang Calero, Cebu City, alas 4 sa hapon sa Miyerkules, Pebrero 20. Nasikop sa Drug Enforcement Group (DEG) Visayas si Joseph Bacalla, 19, usa ka estudyante, lumolupyo sa Sitio Punyang, Duljo Fatima, Cebu City.
Sud sa usa ka balay sa dan Figueroa sa Barangay Sawang Calero, nakuha gikan kaniya ang 16 ka large packs sa shabu.
Si Bacalla nadakpan sud sa usa ka kwarto nga giingong giabangan sa iyang barkada.
Matod ni Police Superintendent Glenn Mayam nga dugay na nilang gi-monitor si Bacalla human sila makadawat og report nga namaligya kini og drugas.
“Gi monitor namo na siya. Naa mi previous reports nga nag deal gyud siya og drugs,” sigon ni Mayam. Si Mayam nibutyag nga si Bacalla miyembro sa dakong sindikato sa Sugbo. Giingon nga aduna usab kini transaksiyon sa Dumaguete ug Bohol.
“Actually kaya niyang mag distribute sa Region 7. Naa mi previous report nga naa siya’y nahatagan sa Dumaguete ug naa pud siya’y nahatagan sa Bohol,” butyag ni Mayam.
Ilang gibana-bana nga mahimo nga makabaligya si Bacalla og di mominus 250 grams nga shabu matag adlaw.
NANGHIMAKAK
Apan si Bacalla mihimakak sa alegasyon. Matod niya nga wa siya’y kalabutan sa mga drugas nga nasakmit sa kwarto nga giabangan sa iyang barkada.
Igo ra siya natug sa sulod.
“Kauban nako ang tag-iya ato. Di ako ang nadala ana, natog ra ko anang hitaboa,” sulti ni Bacalla sa mga tigbalita.
Sigon ni Mayam padayon pa nilang gisusi ang grupo nga gikalambigitan ni Bacalla. Si Bacalla kasamtangang ibutang sa Abellana Police Station.