UPAT ang nasikop sa gilusad nga buy-bust operation sa mga sakop sa Provincial Drug Enforcement Unit sa Cebu Provincial Police Office alas 11:30 Miyerkules sa gabii, Pebrero 20 nga gipangulohan ni Sr. Insp. Alejandro Batobalonos.
Ang mga nadakpan mao silang Marc Tapis, 35; Jerry Regudos Apura, 33; Rene Rabanes Cañete, 44; ug Rosell Dacayaba Palma, 27 nga pulos taga sitio Manggahan, barangay Cansujong, siyudad sa Talisay.
Nakuha kanila ang lima ka large packs, tulo ka medium packs, ug laing 41 ka gagmayng putos sa giilang shabu nga motimbang ang tanan sa 263.73 grams nga mobalor sa P1,793,364.
Nasakmit usab ang P10,000 nga gituohang halin sa ilegal nga drugas, mga gamit sa pag suyop sa giilang shabu, ug duha ka video karera machine.