USA ka drayber sa habalhabal nga natulog sulod sa ilang panimay uban ang iyang kapuyo ang namatay human gisulod sa duha ka mga armado nga lalake ug gipusil sa makadaghang higayon.
Ang biktima giila nga si Clark Tejero Cañadora, 35, taga Purok Tundan, Barangay Basak, dakbayan sa Mandaue.
Matod sa kapulisan, nahitabo ang pagpamusil sa alas 12:15 sa kaadlawon sa Huwebes, Pebrero 21.
Matod sa mga ningrespondeng pulis gikan sa Basak police station sa MCPO, nga ang biktima natulog uban sa iyang kapuyo.
Sa dihang duha ka mga lalaki ang kalit nipatid sa ilang pultahan, sa dihang nakasulod diretso kini nga nipusil kang Cañadora, kinsa tulog kaayo niadtong higayuna.
Ang kapuyo nitug-an sa mga pulis nga giingong giwakli siya sa mga suspek.
Gihulagway sa babaye nga nagsul-ob og full-faced helmet ang mga mamumuno, kinsa dali nga nakasibat human sa pagpamusil.
Nakuha sa crime scene ang upat ka empty shell sa wala pa matino nga armas, duha ka deformed nga bala, usa ka fired bullet ug usa ka tipak sa bala.
Duha ang gisubay sa kapulisan nga motibo sa kremin, Matud sa hepe sa Basak Pol. Station, Chief Inspector Ramil Morpos nga gitan-aw nila ang personal grudge kalabot sa relasyon niini sa kapuyo.
Giingon nga unom ka buwan pa lang sila sa iyang kapuyo, human nagkabulag si Cañadora ug iyang asawa.
Laing gisubay nga motibo ang kalambigitan sa illegal nga drugas.
“Mao ni ato gipangsubay nga angulo, 1st related sa drugs and second kining personal grudge kay amo gitan-aw karon ang possibility nga naay naglagot niya with his relationship sa iyang gikapuyo karon,” tipik sa text message ni Morpos sa Superbalita Cebu.
Gitug-an ni MCPO director, Senior Supt. Julian Entoma nga usa ka station high value target kinsa giingon nga sakop sa grupo sa usa ka giila nga ‘Ungga’ kinsa napatay sa niaging’ tuig.
Si Canadora ug magulang niini ang giingon nga sakop sa grupo nga giingon nga maoy nipuli sa pagpamaligya dili lang sa ilang lugar, apan lakip na sa lungsod sa Consolacion.
Apan gihimakak kini sa kabanay ni Canadora.