MOHATAG og P2.2 million nga ganti ang kampo ni San Fernando Mayor Lakambini “Neneth” Reluya kang bisan kinsa nga adunay impormasyon ug kasayuran sa pagpamanhig kaniya ug sa iyang banang si Association of Barangay Councils (ABC) president Ricardo “Nonoy” Reluya niadtong Enero 22 sa Brgy Linao dakbayan sa Talisay.
Ang ganti ni Neneth gitugbangan ni Ruben Feliciano og P3.5 million.
Si Feliciano, kinsa niinsister nga wa siyay kalabutan sa ambush ug sa pagkamatay ni Nonoy, makig-atbang ni Neneth sa piniliay sa pagka-mayor sa San Fernando karong Mayo.
Si Nonoy ug duha nila ka mga staff nangamatay sa ambush.
Ang mayor niingon nga hayan ang ganti posibleng mosaka pa.
Matod niya natigom kini gikan sa pagtampo-tampo sa suod nga mga higala ug kabanay sa mga Reluya.
Gusto sa mayor nga matudlo ang mastermind sanglit wa pa maestablisar sa padayong imbestigasyon sa kapulisan.
Gibutyag sa mayor nga huot ang dagan sa trapiko sa mga sakyanang padulong sa habagatang Sugbo niadtong gibanhigan siya uban ang iyang bana hinungdan nga dako ang iyang pagtuo nga adunay nakakita sa hitabo.
Nihatag ang mayor og mga numero sa cell phone. Giklaro sa mayor nga susihon ang mga impormasyon nga ilang madawat.
“Ang ako lang mohangyo ko sa mga witness to please help us na ma-resolve ning kasoha because this will set the tone of the next few elections, next election,” hangyo ni Reluya.
NAKAUYON
Gidayeg sa mayor ang dagan sa imbestigasyon sa kapulisan, hilabi na ang pag-umol og Special Investigation Task Group ug pagtumbok sa posibleng mga gunman nga sila si Jerome Labitad ug Felix Abacahan Jr. ug upat ka mga John Doe, kinsa gipasakaan na og mga kasong multiple murder ug multiple frustrated murder.
Giklaro ni Reluya nga bisan kon di pa siya kombinsido sa mga gunman nga maoy nibanhig kanila, mas maayong ihatag na lang nila sa kapulisan ang imbestigasyon.
Subling giklaro sa mayor nga “politically motivated” ang pagbanhig kaniya sanglit giklaro na sa kapulisan nga wa siya malakip sa “drug watchlist” sukwahi sa gipasiatab sa iyang kaatbang sa politika.
Wa usab silay kontra o gikabangi sa negusyo.
“It’s up to the PNP forces yung how to go about this case. Anyway, I’m positive nga mogawas gyud na in the end ‘cause we are persistent in our prayers. I live to tell the tale so continuously nag-pray kami sooner or later hapit na na,” matod ni Reluya.
GISAWAY
Ang pagtanyag ni Reluya og ganti gisaway sa iyang kaatbang nga si Feliciano.
Sa iyang text message sa SunStar Cebu, si Feliciano niingon nga ang mayor nakaako sa pagtigom sa mao nga kwarta bisan kon dunay mga kawani sa munisipyo nga wa pa masweldohi.
“I will also put the same amount representing (the) bounty,” nagkanayon si Feliciano, kinsa subling namasangil nga ang mayor “drug protector.”
Nipasumbingay si Feliciano nga nakadaug si Reluya sa 2016 elections tungod sa “drug money of (self) confessed drug lord Franz Sabalones.”
Iyang gitugbangan ang ganti ni Reluya og P3.5 million.
DI MO-WITHDRAW
Samtang giklaro ni Reluya nga wa siyay plano nga mosibog sa iyang kandidatura pagka mayor. Wa pa usab siyay plano nga paapilon ang iyang mga anak sa politika karon nga wala na ang iyang bana.
Gibutyag sa mayor nga ang kamatayon sa iyang bana maoy usa sa naghatag kaniya og igong kusog nga ipadayon ang iyang kandidatura sa umaabot piniliay.
“I gain strength through inspiration of Nonoy bitaw. Because actually sa SanFern, ang mga road openings, ang mga projects namo di man ko kakuan, siya man tanan,” saysay niya.
Iyang nakita ang grabeng suporta sa katawhan kanila, labina sa iyang bana dihang gidala kini sa San Fernando ug ngadto sa Mindanao.
Giangkon ni Reluya nga apektado ang iyang kandidatura lakip na sa iyang mga kauban sa politika sanglit makuyawan na sila mosuroy alang sa pagpangampanya. Gibutyag usab niya nga gipasaligan na siya sa Police Regional Office (PRO) 7 og duha ka security escorts nga pulis aron masiguro ang iyang kaluwasan.