KAPULISAN sa Syudad sa Sugbo hugot sa ilang pagpangandam sa pag bisita ni Presidente Rodrigo Duterte karong Domingo aron motambong sa himuong political rally sa iyang mga kandidato sa Plaza Independencia.

Sugod karon, gisaka na ngadto sa full alert ang status sa kapulisan sa Central Visayas pagpangandam sa himuon nga political rally sa Partido PDP-Laban.

Matod ni Sr. Supt. Royina Garma, ang hepe sa kapulisan sa Syudad sa Sugbo nga dili na kinahanglan og kamandoan gikan sa ilang mga labaw sa Kampo Crame ang pag isa sa alert status kung ang pangulo na ang mobisita sa usa ka lugar.

Kini nagpasabot nga wala nay mga police nga gitugotan nga maka leave sa ilang trabaho sugod karong adlawa hangtod nga makabiya na sa syudad ang presidente.

Sukad pa niadtong Lunes, Pebrero 18, gipangandaman na sa kapulisan ang ilang paghatag sa seguridad kun pila ka personnel ang ipakatap sa dapit diin adunay mga kalihukan ang PDP-Laban sa domingo lakip na ang augmentation gikan sa Police Regional Office 7.

Nakig-alayon na usab si Col. Garma sa buhatan ni secretary Michael Dino sa Office of the Presidential Assistant for the Visayas alang na sa dugang impormasyon sa mga lakaw sa Presidente.

Gawas sa mga police nga maoy mag silbing area security, uban ang Presidential Security Group (PSG) aduna usab silay giandam nga mga personnel alang sa pag responde kung adunay mga lihok protesta nga himuon sa mga militante.