HUMAN mamahayag si Presidente Rodrigo Duterte nga nagpasumbingay nga si Ashley Abad ang nagkupot sa Ecstasy nga iya ra sab nga giinom, seguradong nadugangan ang kabug-at ug kasakit nga gibati sa iyang pamilya, labina sa iyang mga ginikanan.
Ang nakapait kay si Ashley, 19, patay na, di na makapanalipod sa iyang kaugalingon. Tinuod man o di, di na mabalik pa ang kinabuhi sa dalaga.
Ang angay gukdon niini mao ang nagbaligya sa Ecstasy nga imposible nga wa mailhi nila ni Nel Spencer Tiu ug kaubanan. Di na tingali angay pang tukion kang kinsa ang drugs, kang Tiu ba o Abad.
Mismo ang kapulisan niingon nga maglisod sila sa pagsikop sa mga tigbaligya og Ecstasy kay sekreto ang circle ini ug di si bisan kinsa lang ang baligyaan. Nagpasabot nga ang seller ug buyer kasagaran managkaila lang.
Kon husto ang kapulisan, posible nga nasayod sila si Tiu ug mga higala kang kinsa nagagikan ang Ecstasy. Niini, mahatagan og hustisya ang kamatayon sa dalaga.
Karon napunting ang isyu ngadto sa kon kinsa kanila ni Tiu ang nanag-iya sa Ecstasy nga maoy giinom ug nakaingon sa kamatayon ni Ashley, inay kinsa ang seller.
Hinaot pang nasulti kini nila ni Tiu ug kaubanan ngadto sa mga imbestigador. Kay kon way namaligya og Ecstasy, way nagamit nga party drugs ang mga batan-on.
Pinaagi sa pag-ila sa tinubdan ug pagpasaka og kaso batok niini, makuhaan ang kasakit nga nasinati karon sa mga ginikanan ug sa kinatibuk-ang pamilyang Abad.
Ang paglansang usab sa Ecstasy seller magtibhang sa hulga ning mao nga party drugs ngadto sa mga batan-on nga sakop “alta sociedad” nga hilig og party. Hayan magbukas pa kini sa mas lawom nga estorya sa tagong industriya sa illegal drugs nga mga adunahan lang ang mga parokyano.