Bathalad-Sugbo writing workshop, kombensiyon
ANG Bathalan-ong Halad sa Dagang (Bathalad) - Sugbo mosaulog sa National Arts Month sa Pebrero uban sa duha ka dagkong kalihukan.
Kini mao ang pandayan sa panulat o writing workshop ug usa ka adlaw nga kombensiyon, pasignunot sa bulawanong kasaulogan sa organisasyon nga mohatag pasidungog sa 15 ka mamugnawong magsusulat sa pinulongang Sugbuanon ug sa pag-ila sa mga ‘special awardee’ sa literaturang Sugbuanon.
Ang ikatulong Bathalad Sugbo Creative Writing Workshop adto ipahigayon sa Handuraw Pizza White Gold sa Pebrero 23-24. Pangulohan kini ni Vicente Vivencio T. Bandillo, ang kasamtangang embahador sa Pilipinas ngadto sa Bangladesh, nga nahimong pamuno sa Bathalad niadtong sayong bahin sa Dekada ‘90.
Si Bandillo, nga mao sab ang top diplomat sa Sri Lanka ug Maldives, maoy mangulo sa pandayan sa panulat uban sa mga banggiitan sa literaturang Sugbuanong panelists.
Ang magbabalak ug emhahador nga taga Alcantara, Cebu, usa sa mga ‘Kaplag 15’ nga mga magsusulat nga modawat sa pasidungog sa hapon sa Pebrero 25, uban sa upat ka ‘special awardee’ sa katitikang Sugbuanon adto sa Palm Grass Cebu Heritage Hotel, Junquera St., Cebu City.
Ang ubang ‘Kaplag awardee’ mao sila Dr. Mel Allego, Dr. Erlinda K. Alburo, Abogado Junne Canizares, Ernesto D. Lariosa, Lamberto G. Ceballos, Abogado Cesar P. Kilaton, Rogelio S. Pono, Agustin Don Pag-usara, Ricardo P. Baladjay, Marcelo A. Geocallo, Ricardo I. Patalinjug, Gremer Chan Reyes, Edfer C. Rigodon ug Arturo Penaserada
Ang mga ‘special awardee’ mao sila National Artist for Literature Resil B. Mojares, Ret. Reg. Trial Court Judge Simeon Dumdum, Jr., Dr. Hope S. Yu ug si anhing Godofredo M. Roperosa, kanhi kolumnista sa SunStar Cebu.
Ang mga kalihukan sa Bathalad Sugbo gisuportahan sa mga tawong nagmahal sa pinulongan ug literaturang Sugbuanon, nga naglakip kang Allego ug sa iyang mga kauban ug higalang doktor nga tua magbase sa U.S.A. Way pundo nga gipangayo gikan sa gobyerno, lakip na sa National Commission for Culture and the Arts (NCCA).
Usa si Allego sa mga Garbo sa Sugbo sa tuig 2012 alang sa Literaturang Sugbuanon sa panahon ni Gob. Gwen Garcia. Ang uban mga mananaog sa mga tigi ug bangga sa sinulatay nga naglakip sa upat nga mga mananaog sa Palanca: Ceballos, Lariosa, Patalinjug ug Pag-usara. Ang kinse ka magsusulat nagpadayon pagsulat ug pagpatik sa ilang mga obra sulod na sa 50 ka tuig hangtod karon.
Si Mojares maoy magtutukod sa Cebuano Studies Center ug maoy nagdumala sa Cornelio Faigao Writers’ Workshop sa unang mga dekada sa pagmugna niini, nga nagbaid sa mga abilidad sa daghang mga batan-ong magsusulat sa Kabisay-an ug Mindanao.
Sa iyang bahin, si Dumdum nagsilbing magtutudlo kun mentor sa mga batan-ong magsusulat isip ‘panelist’ sa mga literary workshop. Samtang si Hope Yu nangukay sa mga sinulat sa karaang magsusulat sa karaang panahon ug sa kabag-ohan ug gihubad ngadto sa Iningles.
Si Roperos nagbilin og mutya sa sugilanong Sugbuanon. Siya ang nagpasiugda sa ‘stream of consciousness’ diha sa sugilanon nga naka-impluwensa pag-ayo sa daghang mga magsusulat karon.
Ang ‘Kaplag 15’ ug ang ‘Special Award’ usa ka proyekto nga gitambayayungan sa Bathalad Sugbo ug sa Palm Grass Cebu Heritage Hotel sa siyudad sa Sugbo. (PR)