BUNTAG. Sayo akong mibangon. Wala pa gani alas 6:00 misulod na ako sa banyo aron maligo. Dili ako buot maulahi pagtambong sa akong trabaho isip clerk sa usa ka botika sa dakbayan. Bag-o pa man god ako sa maong gimbuhaton hinungdang mahadlok kong ma-leyt. Dili ko gusto nga mapapha lang sa way hinungdan. Ang akong tambong alas 7:00 sa buntag..

Human kog kaligo, nagtapis kog tualya nga misulod sa akong lawak sa lodging house aron mag-ilis. Nag-abang lang kog kuwarto sanglit dili man ako lumad sa siyudad. Taga Cordova ako nga usa sa mga lungsod sa isla sa Maktan. Mag-ulian ko kausa matag semana panahon sa day-off, kay kon kada adlaw god ko mouli madak-an ko sa gasto sa plete. Kon sumadahon kini sud sa usa ka buwan subra na kaayong i-abang og lawak hinungdang misugot na lang pod si Elena, akong asawa, nga mag-abang ko.

Pagka alas 6:30 namahaw na ko. Nahisama akog miapil og lumba sa kaon sa kapaspas sa akong pagkaon. Paglili ko sa akong relo, alas 6:45 na. Dali kong gi-lock ang sera sa akong kuwarto dayong kanaog. Apan mibaktas pa kog kalim-an ka metro sa atanganan og sakyanan.

Bisan kargado na ang miaging dyip gipara ko kini ug mikabyon. Apan sa pagdagan na sa sakyanan akong naamguhan nga wala nako madala ang akong pitaka. Nakalimtan ko diay kini! Gituktok ko ang dyip ug nanaog. Ang ubang pasahero natingala nganong mikawas ko nga mao pa may pagsakay..

“Leyt na gyud ko ani!” nako pa sa hilom. “Unsa man kahay irason nako sa manedyer? Maldita ra ba kaayo ang among manedyer nga babaye!”

Pag-abot nako sa lodging house gikuha ko dayon ang pitaka sa ibabaw sa katre ug sagol-dagan nga mikanaog pagbalik gikan sa ikaduhang andana. Ug maayo na lang kay nakasakay dayon ko. Alas 7:05 sa buntag na ang gitug-an sa akong relo.

Gipara ko ang dyip pag-abot sa dalan F. Ramos ug mikawas. Gikan sa akong gikanaugang PUJ stop, molakaw pa og mga 20 ka dupa paingon sa botika. Sa akong paglili sa relo, alas 7:20 na. Apan paghitangka ko sa ganghaan mihakop kanako ang katingala kay tinak-upan pa man kini ug akong nalantaw lahos sa bildong bungbong nga nag-agas ang gripo ug nag-andar ang aircon. Gidaitol ko ang akong mga mata sa bungbong ug nasawod sa akong panan-aw si Melia Fajardo, ang pharmacist, nga nagbuy-od ug nagkadugo!

Dihadiha nanawag kog pulis ug sa ilang pag-abot ilang gibuak ang pultahan kay gi-lock man. Sa ilang pagsulod, minunot ko ug akong nakita ang laing duha ka binuhat nga nagluko usab ug nagkadugo. Ang kahera nga si Jennifer Pitogo ug guwardiya nga si Rafael Augusto.

Paghiling sa kapulisan kang Fajardo, wala na kiniy kinabuhi samtang sila si Pitogo ug Augusto nagpitik pa ang pulso busa gihatod dayon kini sa tambalanan. Apan pagka ala-una sa hapon mitaliwan na ang guwardiya samtang ang kahera nakigbugno pa sa kinabuhi ug kamatayon. Ang tulo pulos natusak sa bala ang ulo.

Nakuha sa kapulisan sa nahitabuan ang usa ka .38 kalibreng rebolber nga may tulo pa ka bala ug tulo ka kapsula. Ang maong armas kargada ni Augusto. Adunay pangagpas nga ang guwardiya misuway pagtulis sa botika kay diha may pipila ka salaping papel sa iyang kamot.

“Unsay ngan nimo, Dong?” gisukot ko sa imbestigador. “Ug unsay trabaho mo dinhi?”

“Edgardo Suarez, Sir. Sales clerk ko ning maong botika.”

“Nakakita ka ba sa nahitabo?”

“Wa, Sir. Na-leyt man god ko.”

“Suwerte ka, Dong! Kay kon nasayo ka pa, lagmit apil ka nga biktima!” matod sa pulis.

“Mao lagi, Sir. Nahabilin man god ang akong pitaka sa akong lodging house, maong akong gibalikan.” (KATAPUSAN)